چین میں بیٹے کی پرتعیش شادی کرنے پر سرکاری افسر کو برطرف کردیا گیا

شادی کی تقریب میں مہمانوں کے لئے 210 ٹیبل پر انواع واقسام کے کھانے رکھے گئے تھے. فوٹو: فائل

---

چین میں بیٹے کی شادی دھوم دھام اور پرتعیش طریقے سے کرنے پر سرکاری افسر کو فارغ کردیا گیا۔

چین کے سرکاری ذرائع ابلاغ کے مطابق دارالحکومت بیجنگ کے مضافاتی ضلع چوینگ کے ایک گاؤں کے نائب سربراہ ما لینژانگ نے اپنے بیٹے کی 3 دن تک جاری رہنے والی شادی کی تقریب میں تقریباً 2 لاکھ 60 ہزار امریکی ڈالر خرچ کئے، تقریب میں مہمانوں کے لیے مہنگی گاڑیوں کا انتطام کیا گیا اور انہیں تفریحی مقامات کی سیر کرائی گئی، شادی کی تقریب میں مہمانوں کے لئے 210 ٹیبل پر مہمانوں کی خاطر تواضع کے لئے انواع واقسام کے کھانے رکھے گئے۔

چین کے سرکاری خبر رساں ادارے کے مطابق کمیونسٹ پارٹی کی مقامی ٹیم نے ما لینژانگ کو شادی کی تقریب میں نظم وضبط قائم نہ رکھنے کی بنا پر عہدے سے برطرف کیا، معائنہ ٹیم کو مالینژانگ سے متعلق ایسے کوئی شواہد نہیں ملے جن سے یہ ثابت ہو کہ انہوں نے نے شادی میں سرکاری وسائل کا استعمال کیا ہو تاہم ٹیم کے مطابق حد سے زیادہ خرچ کرنے سے ملک میں حکمراں جماعت کی ساکھ متاثر ہوئی ہے۔

دوسری جانب چینی حکومت نے تمام سرکاری اہلکاروں کو خبردار کیا ہے کہ وہ دولت کی ہرگز نمائش نہ کریں کیونکہ اس سے عوام کے غصے میں اضافہ ہوتا ہے۔