سسرالیوں کی نظر میں ایک بہترین بہو ہوں ریما خان

پاکستانی فلم کی بحالی کے لیے کوشاں ہیں اور جلد فلم انڈسٹری میں اپنا سرمایہ بھی لگاؤں گی، ریما خان. فوٹو: فائل

---

لالی ووڈ کی فلم اسٹار ریما خان نے کہا ہے کہ ان کے سسرالیوں کی نظر میں وہ ایک بہترین بہو ہیں۔

کراچی پریس کلب میں میڈیا سے بات کرتے ہوئے فلم اسٹارریما نے کہا کہ رنگوں اور چکا چوند والی دنیا سے تعلق کے باوجود بھی اپنے سسرالیوں کو یہ کہنے پر مجبور کردیا ہے کہ ریما سب سے بہترین بہو ہے، انہوں نے کہا کہ اس بات پر بہت زیادہ خوشی ہوتی ہے کہ اپنی فلم کے زریعے میں نے جو پودا لگایا تھا، اب اس کے ثمرات پاکستانی فلمی صنعت میں نمودار ہوچکے ہیں، ،جس کا عملی ثبوت نوجوان فلم میکرز کی فلمیں ہیں، ریما کا کہنا تھا کہ وہ پاکستانی فلم کی بحالی کے لیے کوشاں ہیں اور وہ جلد فلم انڈسٹری میں اپنا سرمایہ بھی لگائیں گی، انہوں نے کہا کہ وہ چاہتی ہیں کہ بطور ڈائریکٹر ان کی فلم آسکر ایوارڈ کے لیے نامزد ہو۔

ریما کا کہنا تھا کہ وہ عید قربان کے موقع پر جانوروں کی آلائشوں اور ان سے پھیلنے والے جراثیم کے حوالے سے آگاہی مہم میں بھی حصہ لے رہی ہیں، جس میں وہ کراچی ،لاہور اور دیگر شہروں میں اپنے ہاتھوں سے سڑکوں سے کچرا اٹھائیں گی۔