سوکا ورلڈکپ پاکستان کا دفاعی چیمپین جرمنی کیخلاف شاندار کھیل

پاکستانی ٹیم نے جرمنی کے خلاف میچ ہارکر بھی دل جیت لیے

---

یونان کے ساحلی شہرکریٹ میں جاری سوکا ورلڈ کپ میں پاکستان نے پہلے ورلڈ کپ کی فاتح ٹیم جرمنی کے خلاف عمدہ کھیل پیش کیا۔

پاکستان کو مسلسل تیسرے میچ میں 3-2 سے شکست کا سامنا کرنا پڑا لیکن پاکستانی کھلاڑیواں کی عمدہ پرفارمنس نے حاضرین کو داد دینے پر مجبور کردیا۔

پاکستان ٹیم جرمنی کی مضبوط ٹیم کے خلاف ترنوالہ ثابت نہیں ہوئی اور انہوں نے جرمنی کے مضبوط دفاع میں شگاف ڈالتے ہوئے دو مرتبہ گیند کو جال میں پہنچایا۔ پاکستان کی جانب سے محمد وحید نے شاندار کارکردگی دکھاتے ہوئے دو گول اسکور کیے۔

جرمنی کی ٹیم کو ٹورنامنٹ میں آگے بڑھنے کیلیے پاکستان کے خلاف 6 گول سے فتح درکار تھی تاہم پاکستان نے اسے تین گول تک محدود رکھا۔ اس طرح جرمن ٹیم جیت حاصل کرنے کے باوجود سوکا ورلڈ کپ سے باہر ہوگئی اور ٹائٹل کا دفاع کرنے میں ناکام رہی۔ ایونٹ میں پاکستان اپنا چوتھا اور آخری میچ جمعرات کو ہنگری کے خلاف کھیلے گا۔