بجلی چوروں کیخلاف آپریشن تیز 5 ہزار کنکشن منقطع

مختلف شہروں میں کارروائیاں، 31 حیسکو ملازمین معطل

Numainda Express October 11, 2013

واجبات کی عدم ادائیگی اور بجلی چوری پرہزاروں کنکشن منقطع کر کے 21 کروڑ 35 لاکھ 4 ہزار روپے جرمانہ وصول کیا گیا، حیسکو حکام۔ ۔فوٹو: فائل

حیسکو انتظامیہ نے ریجن کے 12 اضلاع میں بجلی چوروں کے خلاف آپریشن مزید تیز کر دیا ہے۔

ترجمان کی جانب سے جاری کردہ اعداد و شمار کے مطابق ایف آئی اے کی ٹیموں کے ہمراہ مشترکہ کارروائیاں کرتے ہوئے ٹنڈوالیہار، ٹنڈو محمد خان، قاسم آباد، گاڑی کھاتہ، کوٹری، جامشورو، پریٹ آباد، میرپورخاص، ٹھٹھہ، بدین، نوابشاہ، ٹنڈو آدم، سانگھڑ و دیگر شہروں میں واجبات کی عدم ادائیگی اور بجلی چوری پر 5207 کنکشن منقطع کر کے 21 کروڑ 35 لاکھ 4 ہزار روپے جرمانہ وصول کیا گیا۔

جبکہ ڈیوٹی میں غفلت برتنے پر 31 حیسکو ملازمین معطل کر دیے گئے، علاوہ ازیں20 بجلی چوروں کے خلاف ایف آئی آر درج کرانے کے علاوہ 8 کو گرفتار کر لیا گیا۔