وزیراعظم کی کابینہ اراکین کو نوازشریف کی صحت سے متعلق سیاسی بیان نہ دینے کی ہدایت ۔ فوٹو: فائل
ایکسپریس نیوزکے مطابق وزیراعظم کی زیر صدارت وفاقی کابینہ کا اجلاس ہوا، جس میں اینٹی منی لانڈرنگ ایکٹ کے تحت خصوصی کمیٹی بنانے کی منظوری دی گئی جب کہ ایف اے ٹی ایف سیکریٹریٹ قائم کرنے کی بھی منظوری دی گئی جس کے سربراہ وفاقی وزیر حماد اظہر ہوں گے۔
ذرائع کے مطابق معاون خصوصی اطلاعات فردوس عاشق اعوان نے وزیراعظم عمران خان سے وزراء کے رویے پر شکوہ کرتے ہوئے کہا کہ پیمرا کے فیصلے پر حکومتی ارکان نے سوشل میڈیا پر ایسے تنقید کی جیسے وہ اپوزیشن میں ہوں، فیصلوں پر خود وزرا تنقید کریں تو سبکی ہوتی ہے، جس پر وفاقی وزیرسائنس و ٹیکنالوجی فواد چوہدری نے کہا کہ سبکی تب ہوتی ہے جب فیصلے کرکے گھنٹوں میں واپس لیے جائیں۔
ذرائع کا کہنا ہے کہ اجلاس میں آزادی مارچ پر ایک گھنٹہ تک گفتگو ہوئی، اور برینفنگ میں بتایا گیا کہ مولانا فضل الرحمان کے مارچ کو کمیٹی روزانہ کی بنیاد پر دیکھ رہی ہے، یقین دہانی کرائی گئی ہے کہ مارچ کے شرکا معاہدے پر عمل کریں گے۔ وزیراعظم عمران خان کا کہنا تھا کہ آزادی مارچ سے متعلق معاہدہ کرنا اچھا عمل ہے۔
وزیراعظم نے کہا کہ حکومتی مذاکراتی کمیٹی آزادی مارچ سے متعلق فیصلوں کے لیے مکمل طور پر بااختیار ہے، احتجاج پرامن اور قانون کے دائرے میں ہو تو کوئی رکاوٹ نہیں کھڑی کریں گے اور معاہدے کی خلاف ورزی کی گئی تو سخت کارروائی ہو گی ، حکومت کسی ڈیل کا حصہ نہیں اور نہ ہی کرپشن کیسز پر کوئی سمجھوتہ ہوگا۔
وزیراعظم نے کابینہ ارکان کو ہدایت کی کہ نواز شریف کی صحت سے متعلق کوئی سیاسی بیان نہ دے، نواز شریف کو علاج کی ہر ممکن سہولیات فراہم کی جا رہی ہیں اور ان کی صحت کے لئے دعاگو ہیں۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔