جرمنی کی سب سے بڑی مسجد کو بم سے اُڑانے کی دھمکی

اس خوبصورت مسجد کا حال ہی میں افتتاح ترک صدر طیب اردگان نے کیا تھا جسے دوسری مرتبہ بم سے اُڑانے کی دھمکی دی گئی ہے

ویب ڈیسک November 02, 2019

حال ہی میں تعمیر کی گئی خوبصورت مسجد کا افتتاح ترک صدر طیب اردگان نے کیا تھا۔ فوٹو : فائل

جرمنی کی سب سے بڑی اور مرکزی مسجد کو بم دھماکے سے اُرانے کی دھمکی پر پولیس نے فوری طور پر مسجد کو خالی کراکے سرچ آپریشن کیا تاہم بم کی اطلاع جھوٹی ثابت ہوئی۔

بین الاقوامی خبر رساں ادارے جرمنی کے شہر کولون ترک جرمن مساجد کی تنظیم دیتیب کی مرکزی اور جامع مسجد میں ٹیلی فون کے ذریعے بم کی موجودگی کی اطلاع دی گئی تھی جس پر پولیس نے مسجد کو خالی کراکے سرچ آپریشن کیا تاہم ڈیڑھ گھنٹے کی تلاشی کے بعد مسجد کو کلیئر قرار دے دیا گیا۔

کولون سینٹرل مسجد جرمنی میں مسلمانوں کی سب سے بڑی عبادت گاہ ہے اور اسے حال ہی میں تعمیر کیا گیا ہے جس کا افتتاح ترک صدر طیب اردگان نے کیا تھا اور یہاں نمازیوں کا تانتا بندھا رہتا ہے جب کہ مسجد سے ملحقہ حصے میں قائم دفاتر میں لوگوں کی آمد و رفت جاری رہتی ہے۔

واضح رہے کہ اس سے قبل جولائی کے اوائل میں بھی اسی مسجد کو ای میل کے ذریعے دھمکی دی گئی تھی۔ حکومت کی جانب سے اس ای میل کی چھان بین بھی کی گئی تھی لیکن اس کا کوئی نتیجہ سامنے نہیں آیا تھا۔