طالبان سے جنگ یا مذاکرات میں حکومت کا ساتھ دیں گے آصف علی زرداری

سابق صدر آصف علی زرداری نے کہا ہے کہ طالبان کے خلاف جنگ یا ان سے مذاکرات میں حکومت کا مکمل ساتھ دیں گے۔


نوڈیرو میں کارکنوں سے خطاب کرتےہوئے سابق صدر آصف علی زرداری نے کہا کہ ہم نے اپنے دور حکومت کے دوران دہشت گردی پر قابو پانے کی بھرپور کوشش کی اور اب موجودہ جمہوری حکومت کے پاس بھی دہشت گردی کے خاتمے کے لئے مکمل اختیارات ہیں۔ آصف علی زرداری نے وزیراعظم نواز شریف کو یقین دہانی کرائی کہ طالبان سے جنگ کریں یا مذاکرات وہ ان کا مکمل ساتھ دیں گے تاہم کسی تیسری قوت کو موقع نہیں دینا چاہتے۔ انہوں نے کہاکہ افغان جنگ کےباعث خیبرپختونخوا اور بلوچستان میں حالات خراب ہوئے۔ کراچی میں امن قائم کرنے کےلئے آپریشن کی حمایت کی، اگر حمایت نہ کرتے ہوئے شہر کے حالات مزید خراب ہوجاتے۔

سابق صدر کا مزید کہنا تھا کہ ہم صوبائی سطح پر سستی بجلی پیدا کرنے کے مواقع پیدا کریں گے اور سندھ حکومت کو ہدایت کروں گا کہ بے روزگار نوجوانوں کو روزگار فراہم کیا جائے۔