ایم بی اے پاس نوجوان کار چوری کے الزام میں گرفتار

ملزم بہت چالاک ہے اور اس نے ٹیکنالوجی کو استعمال کرتے ہوئے واردات کی۔

Numainda Express/ November 05, 2019

ملزم بہت چالاک ہے اور اس نے ٹیکنالوجی کو استعمال کرتے ہوئے واردات کی۔ فوٹو:رپورٹر

پولیس نے ڈیفنس فیزسے قیمتی گاڑی چرانے والے ایم بی اے پاس چورکوگرفتارکرکے قیمتی گاڑی برآمد کرلی۔

ایس ایس پی اینٹی وہیکل لفٹںگ سیل سرفراز نوازکے مطابق ڈیفنس فیز8 میں واقع نجی سینما میں فلم دیکھنے آنے والے شہری شکیل ولد امیرعلی کی قیمتی گاڑی وی 8 لینڈکروزپارکنگ ایریا سےچوری ہوگئی تھی۔

پولیس نے گاڑی چوری کرنے والے ملزم افضال علی قندھاری کونارتھ ناظم آباد شپ آنر کالج کے قریب کارروائی کرتے ہوئے گرفتارکرکے اس کے قبضے سے چوری شدہ گاڑی برآمد کرلی۔ گرفتارملزم نے دوران تفتیش انکشاف کیا کہ اس نے نجی یونیورسٹی سے ایم بی اے کیا ہے۔ ملزم بہت چالاک ہے اور اس نے ٹیکنالوجی کو استعمال کرتے ہوئے واردات کی۔

گرفتارملزم نے وی 8 لینڈ کروز کے چابی میکرکوانٹرنیٹ کے ذریعہ تلاش کیااور15ہزارروپے معاوضے پر اسے سینما کی پارکنگ میں بلوایا۔ وہاں کھڑی گاڑی کو اپنی گاڑی ظاہر کرکے چابی میکر کی مدد سے گاڑی اسٹارٹ کی اور لیکر فرار ہوگیا۔

گرفتارملزم کا کہنا ہے کہ اس نے 25 لاکھ روپے ادھاردینا تھا جس پراس نے مہنگی گاڑی چوری کرنے کا منصوبہ بنایا۔ اے وی ایل سی پولیس نے سچل تھانے کے علاقے میں کارروائی کرتے ہوئے مزید 3 کار کلفٹر گلبہار، غلام حسین اورغلام یاسین ملک کوگرفتارکرکے ان کےقبضے سے3 چوری شدہ گاڑیاں برآمد کرلیں۔