عوام کے بغیر سیاست اور پاکستان نہیں چل سکتے بلاول بھٹوزرداری

پاکستان پیپلز پارٹی کے چیرمین بلاول بھٹو زرداری نے کہا ہے کہ عوام کے بغیر سیاست اور پاکستان نہیں چل سکتا۔


بلاول ہاؤس کراچی میں کارکنوں سے ملاقات اور خطاب کے دوران بلاول بھٹو زرداری نے کہا کہ پیپلز پارٹی نے ہمیشہ عوام کے حق کے لئے جدوجہد کی ہے اور اس کے لئے کسی بھی قسم کے نقصان کی کبھی پروا نہیں کی، پیپلز پارٹی نے ہمیشہ آمروں کا مقابلہ کیا ہے، ہماری طاقت عوام ہیں جن سے نہ ہی دور رہیں ہیں اور نہ رہ سکتے ہیں۔

بلاول بھٹو زرداری کا کہنا تھا کہ ان کی والدہ بے نظیر بھٹو نے ملک کی سلامتی اور عوام کی بہبود کے لئے کام کیا اور جام شہادت نوش فرمایا وہ پاکستان کے عوام کے دلوں میں ہمیشہ زندہ رہیں گی۔ انہوں نے کہا کہ وہ بھی اپنی والدہ کے نقش قدم پر چل کر پاکستان کے عوام کی خدمت کریں گے اور اس راہ پر چلتے ہوئے کسی بھی قربانی سے دریغ نہیں کریں گے۔