قومی اسمبلی میں اپوزیشن کے شور شرابے میں کئی بل منظور

منظور کئے گئے بل میں میڈیکل بل 2019 اور رہن ضمانتیں آرڈیننس 2019 شامل تھے

ثاقب ورک/حسیب حنیف/ November 07, 2019

پارلیمانی سیکرٹری صحت ڈاکٹر نوشین حامد نے میڈیکل ٹربیونل آرڈیننس پیش کیا فوٹو: فائل

حکومت نے قومی اسمبلی میں ایک گھنٹے میں ریکارڈ قانون سازی کرلی جبکہ اپوزیشن احتجاج کرتی رہ گئی۔

حکومت کی جانب سے قومی اسمبلی میں پیش کیے گئے جائیداد میں خواتین کا حق،وراثت، اعلی عدلیہ میں ضابطہ لباس اور انسداد بے نامی لین دین ترمیمی بل 2019 ء سمیت11بل منظورکئے۔ان میں 9صدارتی آرڈیننسوں کو بل کے طور پر پیش کیا گیا۔

ڈپٹی اسپیکر قاسم سوری نے جمعرات کواپوزیشن کے شدید احتجاج کے باوجود اجلاس کی کارروائی جا ری رکھی اور کسی کو بولنے کا موقع نہ دیا۔اپوزیشن ارکان نے گو نیازی گوکے نعرے لگائے، اس دوران پاکستان طبی کمیشن بل 2019 ء منظور کر لیا گیا۔ اپوزیشن نے ''آرڈیننس فیکٹری''کے نعرے بھی لگائے اور ایجنڈے کی کاپیاں پھاڑ دیں۔

بلوں کی منظوری کے دوران اپوزیشن نے اسپیکر ڈائس کا گھیراؤکر لیا ۔ وزیر پارلیمانی امور اعظم سواتی نے مختلف بل منظوری کیلیے پیش کیے۔اسمبلی نے وراثت بل، پسماندہ طبقات کیلیے قانونی معاونت و انصاف اتھارٹی بل منظور کرلیے۔قومی احتساب بیورو ترمیمی بل 2019 ء کی بھی منظوری دی گئی جس کے تحت احتساب آرڈیننس1999 ء میں ترمیم کی گئی ۔

ایوان میں مجموعی طور پر 15 بل پیش کئے گئے،جن میں سے 11 کی منظوری دی گئی۔ 9 آرڈیننسوں کو بھی بل کا حصہ بنایا گیا،جن میں سے 7 حالیہ جاری ہوئے۔ 3 آرڈیننسوں میں 120 دن کی توسیع دی گئی۔اجلاس میں وزیر اعظم یااپوزیشن لیڈر شریک نہ ہوئے ۔ڈپٹی سپیکر نے 4بجکر 22منٹ پر شروع ہونے والے اجلاس میں ساڑھے پانچ بجے وقفہ نما زکیا،بعدازںاپوزیشن کے احتجاج کے پیش نظر اجلاس آج صبح 11بجے تک ملتوی کر دیا۔

قومی اسمبلی اجلاس میں شرکت کیلیے سابق صدر آصف زرداری، خورشید شاہ اورسعد رفیق کے پروڈکشن آرڈر جاری کردیے گئے۔اسپیکر اسد قیصر نے انھیں اجلاس میں لانے کی ہدایت کر دی۔حیران کن طور پر سابق وزیراعظم شاہد خاقان عباسی اور مسلم لیگ ن کے سابق وزیر قانون پنجاب رانا ثناء اللہ کے پروڈکشن آرڈر جاری نہیں کیے گئے۔آصف زرداری جعلی اکاؤنٹس ،خورشید شاہ آمدن سے زائد اثاثے اور سعد رفیق ہاؤسنگ سوسائٹی کیس میں گرفتار ہیں۔