شیر شاہ تیزرفتارگاڑی کی ٹکر سے موٹرسائیکل سوار2افراد ہلاک

ہاکس بے پر ڈوبنے والے 7افراد کو موقع پر موجود لائف گارڈز نے بچالیا. فوٹو فائل

---

ٹریفک حادثات و دیگر واقعات میں کمسن لڑکی سمیت4افراد ہلاک ہوگئے، ادھر ہاکس بے پر ڈوبنے والے7افراد کو لائف گارڈز نے بچالیا، تفصیلات کے مطابق شیر شاہ میں گاڑی کی ٹکر سے موٹر سائیکل پر سوار2افراد نعیم اور دوست محمد شدید زخمی ہوگئے جنھیں فوری طبی امداد کیلیے چھیپا ایمبولینس کے ذریعے اسپتال لیجایا جا رہا تھا کہ وہ راستے میں ہی دم توڑ گئے ، متوفین یوسف گوٹھ کے رہائشی تھے۔

پولیس کا کہنا ہے کہ حادثے کا ذمے دار ڈرائیور موقع سے گاڑی سمیت فرار ہوگیا،بھینس کالونی میں کرنٹ لگنے سے3سالہ گل صبا نامی لڑکی جاں بحق ہوگئی جس کی لاش چھییا ایمبولینس کے ذریعے جناح اسپتال لائی گئی تاہم متوفیہ کے اہلخانہ لاش بغیر پولیس کارروائی کے اپنے ہمراہ لے گئے،سائٹ کے علاقے میٹروول کے قریب فیکٹری میں کام کے دوران چھت سے گر کر35 سالہ نامعلوم شخص ہلاک ہوگیا جس کی لاش چھیپا ایمبولینس کے ذریعے عباسی شہید اسپتال لائی گئی۔

علاوہ ازیں ماڑی پور کے علاقے ہاکس بے پر پکنک منانے کے دوران نہاتے ہوئے7 افراد کو سمندر کی تیز لہریں اپنے ساتھ بہا کر لے گئیں جنھیں موقع پر موجود لائف گارڈز نے فوری کارروائی کرتے ہوئے بچالیا،متعدد افراد کی حالت غیر ہونے کے باعث انھیں قریب ہی اسپتال لیجایا گیا۔