مصر میں جنسی زیادتی کرنے والے شخص کو قتل کرنے والی لڑکی کیخلاف مقدمہ ختم

بس ڈرائیور نے عمیرہ کو اکیلا پاکر جنسی زیادتی کا نشانہ بنانے کی کوشش کی تھی۔ فوٹو : ٹویٹر

---

مصر کی عدالت نے زیادتی کا نشانہ بنانے والے بس ڈرائیور کو اپنے دفاع میں قتل کرنے والی 15 سالہ لڑکی کے خلاف قتل کے مقدمے کو خارج کرکے آزادی کا پروانہ جاری کردیا۔

بین الاقوامی خبر رساں ادارے کے مطابق رواں برس جولائی میں 15 سالہ لڑکی عمیرہ احمد نے پولیس اسٹیشن میں آکر اپنی گرفتاری پیش کرتے ہوئے ایک بس ڈرائیور کو چھریوں کے وار کرکے قتل کرنے کا اعتراف کیا تھا۔

عمیرہ احمد نے اپنے اعترافی بیان میں بتایا تھا کہ ڈرائیور نے بس کو صحرائی علاقے میں لے جا کر مجھے زیادتی کا نشانہ بنانے کی کوشش کی اس دوران مزاحمت کرتے ہوئے میں نے چھریوں کے وار کیے جس سے ڈرائیور کی موت واقع ہو گئی۔

#فتاة_العياط: أنا غلطت غلطة وبحاسب نفسي عليها https://t.co/V0zEIFd0em pic.twitter.com/3OCoDYL2MP

— المصري اليوم (@AlMasryAlYoum) November 6, 2019

عمیرہ احمد نے اپنے بیان میں مزید بتایا کہ جب میں مکمل طور پر ڈرائیور کے چنگل میں پھنس گئی تو کسی طرح اسے چھری رکھنے پر راضی کرلیا اور جیسے ہی اس نے چھری رکھی میں نے چھری قابو میں کرکے اس پر پہ در پہ 15 وار کیے۔

پولیس نے لڑکی کو 4 ماہ تک اپنی تحویل میں رکھا اور اس دوران شواہد جمع کیے جو لڑکی کے بیان کے عین مطابق نکلے، پولیس کی تفتیشی رپورٹ کی روشنی میں عدالت نے لڑکی کو اپنے دفاع میں قتل کرنے پر مقدمہ خارج کردیا۔