بجلی کی تقسیم کار کمپنیوں میں آٹومیٹڈ نظام متعارف کرانیکا فیصلہ

پہلے مرحلہ میں اسلام آباد میں سسٹم نافذ ہوگا، پھر ملک بھر میں ڈیجیٹل میٹر نصب ہونگے

تنویر محمود راجہ October 23, 2013

منصوبہ 2 سال میں مکمل ہوگا، آئیسکو کا پائلٹ پروجیکٹ کامیابی سے مکمل ہوچکا۔ فوٹو: فائل

SUKKUR: وفاقی حکومت نے ملک میں بجلی کی تمام تقسیم کار کمپنیوں میں مکمل طور پر کمپیوٹرائزڈ اور آٹومیٹڈسسٹم متعارف کروانے کا فیصلہ کیا ہے۔

آئیسکوکے آٹومیٹڈ میٹرریڈنگ سسٹم کے پائلٹ پروجیکٹ کی کامیابی کے بعد پہلے مرحلے میں اسلام آبادبھرمیں آٹومیٹڈ میٹر ریڈنگ سسٹم نافذ کیاجا ئیگاجبکہ بعد میں ملک بھر میں بجلی چوری روکنے کیلیے بتدریج وائرلیس ڈیجیٹل میٹرز اورآٹو میٹڈمیٹر ریڈنگ سسٹم متعارف کروایا جائیگا جس کے تحت2 کروڑ 30 لاکھ سے زائد میٹرز نصب کیے جائینگے،امریکی ادارے یو ایس ایڈ نے تعاون کی پیشکش کی ہے۔

آئیسکوکے ذرائع نے ایکسپریس کوبتایاکہ آئیسکو نے آٹومیٹڈمیٹرریڈنگ سسٹم کے پائلٹ پروجیکٹ کی کامیابی کے بعد آئیسکو کے تمام دفاترکومکمل طورپرکمپیوٹرائزڈ کرنے کا منصوبہ تیار کیا ہے ،یہ منصوبہ تقریباً2سال کے عرصے میں مکمل ہوگا،یو ایس ایڈکے تعاون سے اسلام آبادمیں اس کاپائلٹ پروجیکٹ شروع کیاگیاتھا جس کے تحت سیکٹرجی سکس تھری کے فیڈرمیںآٹو میٹڈمیٹر ریڈنگ سسٹم انتہائی کامیابی سے چل رہاہے ،اب نئے منصوبے کیلیے بھی امریکی ادارے نے تعاون کی پیشکش کی ہے۔ ذرائع کے مطابق اس نظام کے تحت صارفین کی اوور بلنگ اور زائد ریڈنگ کے حوالے سے درپیش شکایات دورکی جاسکیں گی، میٹرز کی ریڈنگ کیلیے کسی میٹر ریڈر کی ضرورت نہیں،اس بارے میں آئیسکو کے سینئرافسر نے نام ظاہر نہ کرنے کی شرط پر اس بات کی تصدیق کی کہ آئیسکونے جی سکس تھری کے علاقے میں تقریباً 400 آٹو میٹڈ میٹرز نصب کئے ہیں۔