باکسر محمد وسیم نے میکسیکو کے سابق عالمی چیمپئن کو شکست دیدی

فتح پر محمد وسیم نے اللہ کا شکر ادا کیا اور پاکستان زندہ باد کا نعرہ بھی لگایا، باکسر عامر خان سپورٹ کیلیے موجود رہے (فوٹو: سوشل میڈیا)

---

پاکستانی باکسر محمد وسیم نے ایک بار پھر اپنی برتری ثابت کرتے ہوئے میکسیکو کے سابق عالمی چیمپئن کو شکست دے دی۔

عالمی میڈیا کے مطابق دبئی میں محمد وسیم اور میکسیکو کے گینگان لوپیز کے درمیان مقابلہ دیکھنے کے لیے باکسر عامر خان بھی موجود تھے جس میں عامر خان اپنے پاکستانی ہم وطن وسیم کی سپورٹ کرتے دکھائی دیئے۔



پاکستانی اور میکسیکن باکسرز کے درمیان یہ فائٹ آٹھ ویں راونڈ تک جاری رہی جس کے بعد ریفری نے محمد وسیم کو فاتح قرار دے دیا۔ محمد وسیم نے رنگ میں اللہ کا شکر ادا کرنے کے ساتھ پاکستان زندہ باد کا نعرہ بھی لگایا۔



جیت کے بعد عامر خان نے انہیں گلے لگا کر مبارک باد دی۔ ان کا کہنا تھا کہ وسیم ایک فائٹر باکسر ہے جو کبھی ہار نہیں مانتا، مجھے یقین ہے کہ وسیم پاکستان کا پرچم ہمیشہ بلند کرتا رہے گا۔