وزیراعظم کے خلاف توہین عدالت کی درخواست پر سماعت آج ہوگی

اسلام آباد ہائی کورٹ کے چیف جسٹس اطہر من اللہ درخواست کی سماعت کریں گے

ویب ڈیسک November 26, 2019

اسلام آباد ہائی کورٹ کے چیف جسٹس اطہر من اللہ آج درخواست پر سماعت کریں گے (فوٹو: فائل)

وزیراعظم عمران خان کی عدلیہ کے خلاف متنازع تقریر پر درخواست سماعت کے لیے مقرر کردی گئی۔

اسلام آباد ہائی کورٹ میں سمیع اللہ خان ایڈووکیٹ کی جانب سے درخواست دائر کی گئی جس میں موقف اختیار کیا گیا کہ وزیراعظم عمران خان کے خلاف توہین عدالت کی کارروائی شروع کی جائے کیوں کہ عمران خان کی تقریر توہین عدالت کے زمرے میں آتی ہے۔

درخواست گزار کا کہنا تھا کہ 18 نومبر کو عمران خان کی تقریر میں اعلی عدلیہ کو اسکینڈلائز کرنے کی کوشش کی گئی جب کہ تقریر کے متنازعہ حصہ کا ٹرانسکرپٹ درخواست کے ساتھ منسلک کر دیا گیا ہے۔

دوسری جانب وزیراعظم عمران خان کی عدلیہ کے خلاف متنازع تقریر پر درخواست سماعت کے لیے مقرر کردی گئی ہے اور اسلام آباد ہائی کورٹ کے چیف جسٹس اطہر من اللہ آج درخواست کی سماعت کریں گے۔