اربوں روپے سے تعمیر سندھ اسمبلی بلڈنگ میں آگ بجھانے والے آلات زائد المیعاد نصب

9 سال قبل نصب آلات انتظامیہ کی نظروں سے اوجھل ہو گئے، ناکارہ آلات ہنگامی صورتحال میں مصیبت کا باعث بن سکتے ہیں

وکیل راؤ November 29, 2019

اسمبلی بلڈنگ میں اجلاسوں کے دوران کابینہ ارکان اور اراکین اسمبلی کے علاوہ بھی سیکڑوں افراد کی آمدورفت ہوتی ہے۔ فوٹو:فائل

سندھ اسمبلی انتظامیہ کی مجرمانہ غفلت سامنے آگئی، اربوں روپے کی لاگت سے تعمیر کی گئی سندھ اسمبلی بلڈنگ میں آگ بھْجانے والے آلات زائد المعیاد ہوگئے، زائد المعیاد آلات کو تبدیل نہیں کیا جا سکا جب کہ 9 سال قبل نصب کیے گئے آلات انتظامیہ کی نظروں سے اوجھل ہوگئے۔

آگ بھجانے کے آلات کسی بھی اہم عمارت میں انتہائی ضروری ہوتے ہیں، سندھ اسمبلی کی عمارت جو چند برس قبل اربوں روپے کی لاگت سے تعمیر کی گئی، جہاں اجلاسوں کے دوران کابینہ ارکان اور اراکین اسمبلی کے علاوہ بھی سینکڑوں افراد کی آمدورفت ہوتی ہے عمارت میں آگ بھجانے والے آلات کی عدم تنصیب پر اسمبلی انتظامیہ سنگین لاپروائی اور مجرمانہ غفلت کی مرتکب ہورہی ہے۔

اسمبلی کے مختلف حصوں میں لگے آلات زائد المعیاد ہوچکے ہیں سروے کے دوران دیکھا گیا کہ آگ بھجانے والا آلات سال دو ہزار دس میں نصب کیے گئے تھے جن کا سالانہ بنیادوں پر اجرا کیا جاتا ہے تاہم سندھ اسمبلی میں یہ آلات تقریباً ایک دہائی پرانے نصب ہیں جنہیں تبدیل کرنے کی اسمبلی انتظامیہ نے زحمت ہی نہیں کی۔

سندھ اسمبلی کی نئی بلڈنگ میں برقی آلات،وائرنگ،ہیوی جنریٹر روم ،پمپنگ اسٹیشن اور دیگر دفاتر میں کسی لگے برقی آلات کے سبب کوئی حادثہ رونما ہوسکتا ہے تاہم آگ بجھانے کے آلات ناکارہ اور کیمیکل زائد المیعاد ہونے کے سبب آگ بجھانے کا انتظام موجود نہیں ہے۔

قواعد کے تحت ہر نجی وسرکاری ادارے کے لیے لازم ہے کہ وہ اپنے ملازمین کو ہنگامی طبی امداد اور آگ پر قابو پانے کی تربیت فراہم کرینگی تاہم قانون بنانے والی سندھ اسمبلی میں ہی قانون پر عمل نہیں ہورہااور سندھ اسمبلی سیکریٹریٹ میں ملازمین کو ہنگامی حالات سے نمٹنے کے لیے تربیت ہی فراہم نہیں کی گئی جبکہ سندھ اسمبلی جیسے صوبے کے انتہائی اہم ،حساس اور بڑے ادارے میں کوئی فائر فائٹر ہی نہیں ہے۔

دوسری جانب سندھ اسمبلی کی نااہلی کی انتہاہے کہ تاریخی سندھ اسمبلی کی عمارت میں لگے فائر ہوز ریل کو نصب کرنے کے بعد سے کئی سال گزرنے کے باوجود استعمال ہی نہیں کیاگیاجبکہ کئی مقامات پر لگے فائر ہوز ریل میں پانی کا کنکشن ہی نہیں ہے بیشتر مقامات پر لگے فائرہوز ریل تاحال پلاسٹک میں لپٹے موجود ہیں۔

صورتحال پر ارکان اسمبلی نے خدشات کا اظہار کیا ہے اور سندھ اسمبلی کی انتظامیہ سے معاملے کا نوٹس لینے اور آگ بھجانے والے تمام آلات تبدیل کرنے کا مطالبہ کیا ہے، موقف جاننے کے لیے سیکریٹری سندھ اسمبلی سے رابطہ کرنے کی کوشش کی گئی تاہم انکا فون ریسیو نہیں ہوا۔