مافیا کو ڈر ہے ہماری دکانیں بند اور پیسہ پکڑا جائے گا وزیراعظم

وزیراعظم عمران خان کا کہنا ہے کہ مافیا کو ڈر لگا ہوا ہے کہ ہماری دکانیں بند اور پیسہ پکڑا جائے گا۔

لاہور میں میڈیا سے بات کرتے ہوئے وزیراعظم عمران خان کا کہنا تھا کہ لاہور اور پشاور میں اسموگ سے لوگ بہت متاثر ہوتے ہیں، بچے خاص طور پر اسموگ سے متاثر ہورہے ہیں، اسٹیل فرنس اوربھٹوں سے اسموگ زیادہ بڑھتی ہے، لاہور میں گزشتہ 10 سال کے دوران 70 فیصد درختوں میں کمی آئی اور ماضی میں اسموگ کے مسئلے پر کبھی توجہ نہیں دی گئی۔


وزیراعظم نے کہا کہ ہم نے اسموگ اور ماحولیاتی آلودگی کے خاتمے کے لیے جامع پروگرام ترتیب دیا ہے، لاہور شہر میں بس سروس کو ہائی بریڈ کریں گے، اس عمل سے 90 فیصد فضا کی آلودگی میں کمی آجائے گی، 3 سال میں واضح فرق لوگوں پر ظاہر ہوجائے گا۔ ایک سوال کے جواب میں عمران خان کا کہنا تھا کہ پنجاب میں تبدیلیوں سے پہلے مشاورت کی گئی، پنجاب میں تبدیلیاں گورننس بہترکرنے کے لیے کی گئیں۔

وزیراعظم نے کہا کہ سب سمجھ رہے تھے حکومت چند دنوں کی مار ہے، حکومت بہت بڑے مافیا سے مقابلہ کررہی ہے اور گھرمقروض ہوجاتا ہے تو کچھ دیرمشکلات کا سامنا کرنا پڑتا ہے لیکن آج کل ملک مشکل وقت سے نکل رہا ہے، ملک کی معیشت ٹھیک ہورہی ہے، غیر ملکی سرمایہ کاری آرہی ہے، ترقی کی شرح بڑھ رہی ہے، ورلڈ بینک کے صدر نے پاکستان کی معیشت کی تعریف کی۔

وزیراعظم کا کہنا تھا کہ حکومت نے انسانی ہمدردی کی بنیاد پر نوازشریف کو علاج کے لیے بیرون ملک جانے دیا لیکن جلد عدالت میں میڈیکل رپورٹ سامنے آئے گی تو سب پتہ چل جائے گا جب کہ مافیاعثمان بزدار کے پیچھے پڑا ہوا ہے، مافیا کو ڈر لگاہوا ہے کہ ہماری دکانیں بند اور پیسہ پکڑا جائے گا، مافیا کی توجہ پاکستان نہیں بلکہ اپنا پیسہ بچانا ہے، ہم مافیا نہیں ہیں لوگوں کو قوم کا پیسہ نہیں کھلاسکتے۔ ایک سوال کے جواب میں انہوں نے کہا کہ اورنج لائن ٹرین 10دسمبر سے چلے گی۔