سیاچن میں برفانی تودہ گرنے سے بھارتی فوج کے 2 اہلکار ہلاک

ریسکیو ٹیم نے برفانی تودے سے 2 بھارتی فوجیوں کی لاشیں نکال لیں۔ فوٹو : فائل

---

مقبوضہ کشمیر کے علاقے سیاچن میں بھارتی فوج کے قافلے پر برفانی تودہ گر گیا جس کے نتیجے میں 2 اہلکار ہلاک ہوگئے۔

غیر ملکی خبر رساں ادارے کے مطابق شمالی سیاچن گلیشیئر کے علاقے میں میں 18 ہزار فٹ کی بلندی پر بھارتی فوج کا قافلہ معمول کی گشت پر تھا، اس دوران اچانک برفانی تودا گرگیا جس کے نتیجے میں بھارتی فوج کی گاڑی ملبے تلے دب گئی اور دو اہلکار ہلاک ہو گئے۔

واقعے کی اطلاع ملتے ہی امدادی ٹیمیں جائے وقوعہ پر پہنچیں اور برف میں دبے اہلکاروں کو باہر نکال کر طبی امداد فراہم کی اور قریبی فوجی اسپتال منتقل کیا جہاں دوران علاج دونوں اہلکار ہائپوتھرمیا یعنی جسم کا درجہ حرارت خطرناک حد تک گر جانے کے باعث دم توڑ گئے۔

یہ خبر پڑھیں: سیاچن میں برفانی تودہ گرنے سے 4 بھارتی فوجیوں سمیت 6 افراد ہلاک

رواں ماہ برفانی تودہ گرنے کا یہ دوسرا واقعہ ہے، پہلا واقعہ 19 نومبر کو اسی مقام پر ہوا تھا جس میں 4 بھارتی فوجی اور 2 قلی ہلاک ہوگئے تھے جب کہ رواں برس کا یہ چوتھا واقعہ ہے مجموعی طور پر ان واقعات میں صرف ایک سال میں ایک درجن سے زائد بھارتی فوجی ہلاک ہوئے ہیں۔

سیاچن گلیشیئر ہمالیہ کے مشرقی قراقرم پہاڑی سلسلے میں واقع ہے جسے دنیا کا بلند ترین فوجی علاقہ قرار دیا جاتا ہے اور اس پر پاکستان اور بھارت کے درمیان کئی جھڑپیں بھی ہوچکی ہے۔ سردی کے موسم میں سیاچن میں برفانی تودوں کا گرنا معمول ہے اور درجہ حرارت منفی 60 ڈگری سے بھی گرجاتا ہے۔

یہ خبر بھی پڑھیں: برفانی تودہ گرنے سے بھارتی فوجی ہلاک، 5 اہلکار لاپتہ

واضح رہے کہ اس علاقے میں گولی سے زیادہ ہلاکتیں موسم کی وجہ سے ہوتی ہیں اور دسمبر 2015 میں بھارتی وزیر داخلہ راؤ اندرجیت سنگھ نے لوک سبھا میں بتایا تھا کہ موسم کی وجہ سے بھارتی فوج کے 869 فوجی سیاچن میں ہلاک ہوچکے ہیں۔