اظہر محمود کی ایک بار پھر پاکستانی کرکٹ میں واپسی

وقار یونس اورمکی آرتھر کے تاحال کسی فرنچائز سے معاملات طے نہیں ہو سکے۔ فوٹو:فائل

---

اظہر محمودکی ایک بار پھر پاکستانی کرکٹ میں واپسی ہو رہی ہے، وہ پی ایس ایل5میں ملتان سلطانز کے فاسٹ بولنگ کوچ ہوںگے جب کہ مشتاق احمد اسپنرز کی رہنمائی کریں گے۔

ورلڈکپ میں پاکستان ٹیم کی کارکردگی معیاری نہ رہی اور اسے پہلے مرحلے تک ہی محدود رہنا پڑا،اس کا نزلہ کوچ مکی آرتھر اور معاونین پر گرا،ان میں بولنگ کوچ اظہر محمود بھی شامل تھے، سابق ٹیسٹ آل راؤنڈر پی ایس ایل میں کراچی کنگز کے ساتھ وابستہ رہے،البتہ اب ان کی ملتان سلطانز کے ساتھ بطور فاسٹ بولنگ کوچ واپسی ہورہی ہے۔

ذرائع نے بتایا کہ اظہر کے فرنچائز سے معاملات تقریباً طے ہو چکے ہیں، قومی اسپن بولنگ کنسلٹنٹ کی پوسٹ کے مضبوط امیدوار مشتاق احمد اسپنرز کی رہنمائی کریںگے،ماضی میں پشاور زلمی سے وابستہ رہنے والے عبدالرحمان کو نائب کوچ بنایا جائیگا۔

ہیڈ کوچ کی ذمہ داری سابق زمبابوین کرکٹر اینڈی فلاور سنبھالیں گے،ملتان سلطانز کو اس بار نئے کپتان کی بھی تلاش ہوگی، شعیب ملک کسی اور ٹیم کی جانب سے ایکشن میں دکھائی دینگے،کراچی کنگز سے فارغ ہونے والے مکی آرتھرکے تاحال کسی فرنچائز سے معاملات طے نہیں ہو سکے ہیں، اس بار ان کا پی ایس ایل کیلیے پاکستان آنا دشوار لگتا ہے۔

کراچی کنگزکے ہیڈکوچ ڈین جونز ہوں گے، قومی کرکٹ ٹیم کے ہیڈ کوچ مصباح الحق اسلام آباد یونائٹیڈکی رہنمائی کرینگے، فرنچائزکے ساتھ اس بار وقار یونس بطور بولنگ کوچ موجود نہیں ہوں گے، وہ اب اسی حیثیت سے قومی کرکٹ ٹیم کے ساتھ منسلک ہیں۔