فوری الیکشن نہ ہوئے تو سخت فیصلے بھی کرسکتے ہیں فضل الرحمن

نواز شریف ڈاکٹروں کے کہنے پر بیرون ملک گئے تھے اور ان ہی کے کہنے پر واپس آئیں گے، سربراہ جے یو آئی (ف)

ویب ڈیسک December 01, 2019

نواز شریف ڈاکٹروں کے کہنے پر بیرون ملک گئے تھے اور ان ہی کے کہنے پر واپس آئیں گے، سربراہ جے یو آئی (ف) (فوٹو: فائل)

جمعیت علمائے اسلام (ف) کے سربراہ مولانا فضل الرحمن نے کہا ہے کہ ملک پر بازاری قسم کے لوگ حکمرانی کر رہے ہیں اگر فوری الیکشن نہ ہوئے تو سخت فیصلے بھی کرسکتے ہیں۔

کوئٹہ میں پریس کانفرنس کرتے ہوئے مولانا فضل الرحمن نے کہا ہے کہ ایک سال میں ملکی بحران میں اضافہ ہوگیا، ملکی معیشت کی صورتحال خطرناک ہے اور تمام ادارے ناکام ہوچکے ہیں، ملک کی انڈسٹری اور کاروباری طبقہ سرمایہ باہر لے جانے کا سوچ رہا ہے، ہزاروں کی تعداد میں لوگوں کو بے روزگار کیا جا رہا ہے جب کہ عام آدمی روٹی اور سبزی بھی نہیں خرید سکتا، کیا حکمرانوں کو گوربا چوف بننے کا شوق ہے؟

سربراہ جے یو آئی نے کہا کہ کشمیر کا مسئلہ ہماری خارجہ پالیسی کی اساس تھا جسے تیسرے درجے پر دھکیل دیا گیا، پارلیمنٹ پر لوگوں کا اعتبار نہیں رہا، آزادی مارچ نے لوگوں کو متحد کرکے نظام پر عدم اعتماد کا اظہار کردیا، بہتری کی امید پر ملک کو تباہ نہ کیا جائے۔

آرمی چیف کی مدت ملازمت میں توسیع کے معاملے پر انہوں نے کہا کہ ایکسٹیشن کے معاملے پر نااہلی نے دنیا کو جگ ہنسائی کا موقع دیا، اس پارلیمنٹ کو قانون سازی کا حق نہیں ہے۔

مولانا فضل الرحمن نے کہا کہ دوسروں کو مافیا کہنے والے خود مافیا ہیں، ملک میں فوری الیکشن کرائے جائیں، اگر عوام کے اس مطالبے سے انحراف کیا گیا تو مزید سخت فیصلے بھی کیے جاسکتے ہیں۔

سربراہ جے یو آئی (ف) نے کہا کہ ملک پر بازاری قسم کے لوگ حکمرانی کر رہے ہیں، چین سے ہماری 70 سالہ دوستی ہے اس دوستی کو اس وقت دھچکا پہنچا ہے۔

انہوں نے مزید کہا کہ نواز شریف ڈاکٹروں کے کہنے پر علاج کے لیے بیرون ملک گئے تھے اور اب ان ہی کے کہنے پر واپس آئیں گے۔