نادہندگی پر سرکاری اداروں کے ہزاروں بجلی کنکشنز منقطع

حیسکو چیف کی ہدایت پر12اضلاع میں کارروائیاں جاری، سو فیصد وصولی کے بعد ہی بجلی بحال کی جائیگی ،لئیق احمد

Numainda Express October 31, 2013

حیسکو چیف کی ہدایت پر12اضلاع میں کارروائیاں جاری، سو فیصد وصولی کے بعد ہی بجلی بحال کی جائیگی ،لئیق احمد. فوٹو: فائل

چیف ایگزیکٹو آفیسر حیسکو لئیق احمد خان نے افسران کو ایک بار پھر واضح ہدایات دی ہیں کہ تمام نادہندگان کے بجلی کنکشن فوری منقطع کیے جائیں اور واجبات کی 100 فیصد وصولی کے بعد ہی ان کی بجلی بحال کی جائے۔

ترجمان کے مطابق حیسکو چیف کی ہدایت پر 12 اضلاع میں تمام وفاقی اور صوبائی نادہند سرکاری اداروں کے خلاف کارروائیاں جاری ہیں۔ اس سلسلے میں حیدرآباد، لطیف آباد، ٹنڈوالہیار، ٹنڈو جام، عمرکوٹ، میرپورخاص، ڈگری، سامارو، ٹنڈو محمد خان، بدین، ٹھٹھہ، سانگھڑ، ٹنڈو محمد خان، کوٹری، نوابشاہ، قاضی احمد، سانگھڑ، کھپرو، دوڑ، شاہ پور چاکر، سجاول، تلہار، گولارچی، سعید آباد و دیگر علاقوں میں سرکاری اداروں کیخلاف جاری آپریشن کے دوران 3900 بجلی کے کنکشن واجبات کی عدم ادائیگی پر منقطع کر دیے گئے ہیں۔

جس میں ایریگیشن اینڈ ڈرینج، ٹیوب ویلز، ایکسائز اینڈ ٹیکسیشن، اسٹریٹ لائٹس، ٹی ایم ایز، اسکارپ، تعلیم، ھاؤس بلڈنگس، سیڈا، ہیلتھ اینڈ ویلفیئر، آر بی او ڈی پراجیکٹ، کنٹونمنٹ بورڈ حیدرآباد، پبلک ہیلتھ انجینئرنگ شامل ہیں۔ واضح رہے کہ حیسکو انتظامیہ نے تمام وفاقی اور صوبائی اداروں کو واجبات کی ادائیگی کے لیے حتمی نوٹس بھی جاری کر دیے تھے۔