روس نے امریکا کو مطلوب سی آئی کےسابق اہلکار ایڈورڈ اسنوڈن کو نوکری فراہم کردی

امکان ہے کہ اسنوڈن کو ویب سائٹ فیس بک کی طرز پر ایک روسی ویب سائٹ کی تیاری میں اہم ذمہ داریاں سونپی جا رہی ہیں۔ فوٹو: فائل

---

روس نے امریکا کو مطلوب سی آئی اے کی اہم معلومات افشاں کرنے والے سابق اہلکار ایڈورڈا سنوڈن کوایک اہم روسی ویب سائٹ کے لئے نوکری فراہم کردی ہے۔

غیرملکی خبررساں ایجنسی کے مطابق ایڈورڈ اسنوڈن کے وکیل کا کہنا تھا کہ اسنوڈن اہم روسی ویب سائٹ کی تیاری میں مدد فراہم کریں گے اور وہ یکم نومبرسے اپنی ذمہ داریاں سنھبال لیں گے، ایڈورڈ اسنوڈن کے وکیل نے سیکیورٹی وجوہات کی بنا پر ویب سائٹ کا نام نہیں بتایا تاہم اس بات امکان ظاہر کیا جا رہا ہے کہ اسنوڈن کو سوشل میڈیا کی مقبول ترین ویب سائٹ فیس بک کی طرز پر ایک روسی ویب سائٹ کی تیاری میں اہم ذمہ داریاں سونپی جا رہی ہیں اوراسنوڈن کو اس حوالے سے اگست میں آفر بھی کی گئی تھی، دوسری جانب فیس بک کی طرز کی روسی ویب سائٹ کے پریس سیکریٹری نے اس حوالے سے کسی قسم کا بیان دینے سے گریز کیاہے۔

واضح رہے کہ روس نے امریکا کی دھمکیوں کو کسی خاطر میں نہ لاتے ہوئے اگست میں ایڈورڈ اسنوڈن کو ملک میں عارضی پناہ دی تھی اور اس کے بعد سے وہ روس میں رہائش پزیر ہیں۔