ایچ آئی وی متاثرہ بچوں کے والدین پرالگ گاؤں بسانے کیلیے دباؤ

متاثرہ خاندانوں کورتوڈیرو نہ چھوڑنے پرخاموش سماجی بائیکاٹ کا سامنا

سمیر مندھرو December 14, 2019

لاڑکانہ میں ایڈز کی وبا پر عالمی ماہرین کی ڈبلیو ایچ او کو بھیجی گئی پہلی رپورٹ سامنے آگئی۔ فوٹو:فائل

ایچ آئی وی ایڈز کے باعث قبل از وقت موت کے خطرے سے زیادہ مہلک ایچ آئی وی سے ہونے والی رسوائی ہے جولوگوں کو مار رہی ہے۔

ایچ آئی وی کے بدنما داغ کے ساتھ زندگی گزارنا سب سے زیادہ تکلیف دہ شے ہے۔ رتوڈیرو میں جہاں سیکڑوں بچے اپنی کسی غلطی یا کوتاہی کے بغیر اس لاعلاج بیماری کا شکار ہوئے ہیں وہاں کے لوگوں نے متاثرہ خاندان سے متنفر اور خاموش سماجی بائیکاٹ کر رکھا ہے۔ ایچ آئی وی سے متاثرہ بچوں کے والدین کے عزیز و اقارب بھی ان کے خلاف گروہ بندی کررہے ہیں۔

لوگوں کا مطالبہ ہے کہ وہ یا تو اپنے آبائی علاقوں میں چلے جائیں یا پھر سماجی بائیکاٹ کا سامنا کریں۔ رتو ڈیرو سے 6 کلومیٹر دور واقع سبحانی خان شیر کے 30 متاثرہ خاندانوں سے 6 ماہ سے اچھوتوں جیسا طرزعمل اختیار کیا جا رہا ہے کیونکہ حالیہ وبا کے دوران ان خاندانوں کے 32 بچوں میں ایچ آئی وی وائرس کی تصدیق ہوئی تھی۔

متاثرہ بچوں کے والدین پرگاؤں چھوڑنے کے لیے مسلسل دباؤ ہے تاکہ علاقہ کے دوسرے بچے 'صحت مند' رہ سکیں۔ سبحانی خان شیر کے ایک 32 سالہ پولیس اہلکار نے ایکسپریس ٹریبون سے بات کرتے ہوئے انکشاف کیا کہ ایچ آئی وی وائرس کے شکاربچوں کے والدین کو گاؤں چھوڑنے اور اپنا الگ گاؤں بسانے کے لیے مسلسل دباؤہے جب کہ کچھ خاندان ہجرت بھی کرگئے ہیں۔

ایک اورمتاثرہ والد دل مراد گھنگرو کا کہنا ہے کہ ہمارے بچے معصوم اور اس سماجی خلا سے انجان ہیں۔ ان بچوں کا علاج معالجہ کرنے والے ڈاکٹر عمران اکبر اربانی نے بتایا کہ رویئے پر متاثرہ خاندانوں نے آپسی میل جول بنا لیا ہے۔

دوسری جانب سندھ ایڈزکنٹرول پروگرام کے سربراہ ڈاکٹر سکندر میمن نے کہا کہ ایچ آئی وی متاثرین سے نفرت کی روک تھام کے لئے ہم علما کی خدمات لے رہے ہیں۔ تاہم سماجی روایات ہماری مہم سے زیادہ مضبوط ہیں۔