قاتل اداؤں کی ملکہ متھیرا بالی ووڈ نگری میں قدم رکھنے کیلئے تیار

متھیرا نے آڈیشن میں اچھی اداکاری کے جوہر دکھائے جس کے باعث انہیں اپنی فلم میں ڈیبیو رول دینے کا فیصلہ کیا، سنیل بوہرا فوٹو: فائل

---

وی جے سے ایکٹنگ کی دنیا میں قدم رکھنے والی متھیرا نے اپنی قاتل اداؤں سے بالی ووڈ فلم نگری کے لوگو ں کو بھی اپنا دیوانہ بنا لیا ہے اور جلد ہی وہ بالی ووڈ کی فلم میں اداکاری کرتی نظر آئیں گی۔

متھیرا سنیل بوہرا کی کامیڈی فلم "اکی تے وکی تے نکی" میں اداکاری کے جوہر دکھائیں گی، فلم کی کہانی ایسے نوجوانوں کے گرد گھومتی ہے جو بالی ووڈ میں اپنا کیریئر بنانے کی کوششوں میں سرگرداں ہیں۔ فلم کی ہدایت کاری وپن شرما دیں گے جنہوں نے عامر خان کی مشہور فلم تارے زمین پر میں چائلڈ اسٹار درشیل سفاری کے والد کا کردار نبھایا تھا۔

بھارتی جریدے کے مطابق سنیل بوہرا نے متھیرا کو اپنی فلم میں کاسٹ کرنے کی تصدیق کرتے ہوئے کہا کہ فلم کی شوٹنگ 3 نومبر سے شروع ہو گی اور متھیرا 5 نومبر سے اپنا کام شروع کریں گی، سنیل بوہرا نے کہا کہ ان کے دوست نے دبئی میں انہیں متھیرا کی تصاویر دکھائیں جنہیں دیکھ کر وہ دنگ رہ گئے اور پھر وہ تصاویر انہوں نے فلم کے ہدایت کار وپن شرما کو دکھائیں جنہوں نے متھیرا کا آڈیشن لینے کو کہا، متھیرا نے آڈیشن میں اچھی اداکاری کے جوہر دکھائے اوریوں ہم نے انہیں اپنی فلم میں ڈیبیو رول دینے کا فیصلہ کیا۔

متھیرا جنہوں نے حال ہی میں پاکستانی فلم "میں ہوں شاہد آفریدی" میں آئٹم سانگ کیا تھا بالی ووڈ میں فلم ملنے پر کافی خوش ہیں، متھیرا کا کہنا ہے کہ میں وپن شرما کے ساتھ کام کرنے پر بہت خوش ہوں اور کہا کہ فلم کی شوٹنگ بھارت میں ہو گی اور وہ شوٹنگ کے لئے رواں ماہ وہاں پہنچیں گیں۔