گرفتار ملزمان کیخلاف عدالتوں میں ٹھوس شواہد دینگےڈی جی رینجرز

آپریشن میں گرفتار ملزمان کے مقدمات کی پیش رفت اور سپریم کورٹ کی ہدایات پر غور

Staff Reporter November 03, 2013

کراچی میں جاری ٹارگٹڈ آپریشن پر اطمینان،اجلاس میں رینجرز و پولیس حکام اورسرکاری وکلا کی شرکت ۔ فوٹو : ایکسپریس/فائل

GUADALAJARA: رینجرز اور پولیس حکام کے اعلیٰ سطحی اجلاس میں ٹارگٹڈ آپریشن کے دوران سنگین جرائم میں ملوث گرفتار ملزمان کے مقدمات کا جائزہ لیا گیا ہے اور کراچی میں جاری ٹارگٹڈ آپریشن میں گرفتار ملزمان کے مقدمات کی عدالتی پیش رفت اور ان مقدمات کی عدالتوں میں موجودہ حالت کے حوالے سے غورکیا گیا۔

اجلاس ڈائریکٹرجنرل سندھ رینجرز میجر جنرل رضوان اختر کی زیر صدارت ہیڈکواٹرز سچل رینجر ز میں منعقد ہوا جس میں ایڈیشنل آئی جی کراچی شاہد حیات ، تینوں زونل ڈی آئی جیز ،رینجرز کے سیکٹرکمانڈرز ،رینجرز کودیے گئے پانچویں پولیس اسٹیشنوں کے تفتیشی افسران کے علاوہ پبلک پراسیکیورٹر اور رینجر زکے پراسیکیورٹرز نے شرکت کی۔

اجلاس میں پولیس اوررینجرز کے موجودہ ٹارگٹڈ آپریشن پر اطمینان کا اظہار کیا گیا، ذرائع نے بتایا ہے کہ اجلاس میں پولیس اور رینجرز کی جانب سے کیے جانے والی مشترکہ ٹارگٹڈ آپریشن کے دوران گرفتار اہم ملزمان کے مقدمات میں ہونیوالی پیش رفت پر جائزہ لیا گیا اور اس بات پر غور کیا گیا کہ پولیس اور رینجرز کی جانب سے کی جانے والی کارروائیوں کے نتیجے میں گرفتار ملزمان کے خلاف ٹھوس شواہد عدلتوں میں پیش کیے جائیں تاکہ گرفتار ملزمان کو قرار واقعی سزا دلوائی جا سکے، اجلاس میں سپریم کورٹ کی جانب سے دی جانے والی حالیہ ہدایات پر بھی غور کیا گیا اور سپریم کورٹ کی ہدایات پر عملدرآمد یقینی بنانے کیلیے حکمت عملی پر غور کیا گیا۔