فلپائن نے امریکا پر پابندیاں عائد کردیں

امریکی سینیٹرز نے فلپائن صدر کی سخت ناقد خاتون رہنما کو حراست میں رکھنے والے حکام پر پابندی عائد کرنی کی سفارش کی تھی

ویب ڈیسک December 27, 2019

فلپائن نے دو امریکی سینیٹرز پر ملک میں داخلے پر پابندی عائد کردی ہے، فوٹو : فائل

MEXICO CITY: فلپائن نے دو امریکی سینیٹرز پر سفری پابندیاں عائد کردی ہیں جب کہ عام امریکی شہریوں کے لیے بھی ویزہ پالیسی سخت کردی گئی ہے۔

بین الاقوامی خبر رساں ادارے کے مطابق فلپائن نے دو امریکی سینیٹرز رچرڈ ڈربن اور پیٹرک لیہے کے ملک میں داخل ہونے پر پابندی عائد کردی ہے۔ علاوہ ازیں امریکی شہریوں کیلیے نرم کی گئی ویزہ پالیسی کو ختم کر کے ویزے کے حصول کو سخت بنا دیا جائے گا۔

پابندیوں کی زد میں آنے والے دونوں امریکی سینیٹرز نے فلپائن کے اُن حکام پر سفری پابندیاں عائد کرنے کی سفارش کی تھی جو فلپائن کی سماجی کارکن اور سینیٹر لیلا دی لیما کی غیر قانونی حراست کے ذمہ دار ہیں۔

سینیٹر لیلا نے انسداد منشیات آپریشن کے دوران قتل عام پر صدر کیخلاف تحقیقات کا آغاز کیا تھا جس کے بعد سینیٹر لیلا پر منشیات فروشی کا الزام عائد کرکے پابند سلاسل کردیا گیا تھا۔ سینیٹر لیلا صدر روڈریگو دوتیرتے اور ان کی حکومت کی سخت ناقد رہی ہیں۔

امریکا کی جانب سے اپنے سینیٹرز پر لگائی گئی فلپائن کی پابندیوں پر تاحال کوئی ردعمل سامنے نہیں آیا ہے۔ رواں برس فلپائن کی امریکی شہریوں کیلیے 30 دن تک ویزے کے بغیر داخلے کی پالیسی سے فائدہ اُٹھاتے ہوئے 7 لاکھ 92 ہزار امریکی شہری فلپائن کے دورے پر آئے تھے۔