پیپلزپارٹی آئندہ انتخابات میں کلین سوئپ کریگیشرجیل میمن

صوبائی وزیراطلاعات شرجیل انعام میمن نے کہا ہے کہ پیپلز پارٹی آئندہ انتخابات میں کلین سوئپ کرے گی۔


اپنے بیان میں انھوں نے کہا ہے کہ پیپلزپارٹی آئندہ انتخابات میں مسلم لیگ (ن) ، تحریک انصاف سمیت تمام غیر جمہوری قوتوں کو شکست سے دوچار کرے گی، صوبائی وزیر نے کہا ہے کہ سندھ پی پی کا مضبوط قلعہ ہے اور مسلم لیگ (ن) آئندہ انتخابات میں صوبے سے ایک بھی نشست حاصل نہیں کر سکتی، چار سالہ دور میں پیپلز پارٹی نے سندھ میں بے شمار ترقیاتی کام کیے ہیں،جاری ترقیاتی منصوبے اور تکمیل شدہ منصوبے اس بات کا کھلا ثبوت ہیں۔

انھوں نے مزید کہا کہ بحیثیت عوامی نمائندہ ہونے کی وجہ سے ہم عوام کو جوابدہ ہیں ، کسی بھی پی سی او ججز کو جوابدہ نہیں ہیں اور ہم صدر آصف علی زرداری کی مفاہمتی پالیسیوں پر عمل پیرا ہیں، دریں اثناء صوبائی وزیر شرجیل انعام میمن نے کہا کہ شہید رانی بینظیر بھٹو جیسی متحرک شخصیت نے پاکستان کے لیے بے شمار ترقیاتی منصوبوں کا آغاز کیا جس میں تھرکول اور گورکھ ہل جیسے منصوبے شامل ہیں مگر نواز شریف کی تنگ نظر سوچ نے ان منصوبوں کو بند کروایا جو غیر جمہوری اور ملک سے مخلص نہ ہونے کا ثبوت ہے۔