ملائشیا میں پھنسے 300 پاکستانیوں کو پی آئی اے کے ذریعے واپس لانے کا اعلان

حکومت نے پی آئی اے کی خصوصی پرواز کے ذریعے ملائشیا میں محصور 300 پاکستانیوں کو وطن واپس لانے کا فیصلہ کیا ہے۔

ترجمان پی آئی اے کے مطابق ادارے کی جانب سے 31 دسمبر کو کوالالمپورملائشیا سے خصوصی پرواز چلائی جائے گی جس کے ذریعے ملائشیا میں محصور 300 سے زائد پاکستانی اپنے پیاروں کے پاس واپس پہنچیں گے۔


ترجمان کے مطابق پی کے 9895 کوالالمپور کے مقامی وقت کے مطابق 30 اور 31 دسمبر کی درمیانی رات 3.30 پر روانہ ہو گی اور صبح 9.50 پر اسلام آباد پہنچے گی۔

ترجمان کے مطابق اتنی بڑی تعداد میں لوگوں کو اتنی جلدی لانے کے لیے کوئی ایئرلائن تیار نہ تھی، پی آئی اے کے چیف ایگزیکٹو آفیسر ایئر مارشل ارشد ملک نے فوری طور پر اس معاملے کو اہم قومی فریضہ سمجھتے ہوئے ہم وطنون کو واپس پاکستان پہنچانے کے لیے خصوصی پرواز چلانے کا اعلان کیا۔

پاکستانی شہری مختلف وجوہات کی بنا پر ملائشین حکام کی تحویل میں تھے جن میں ویزا کی میعاد ختم ہونا اور دیگر معمولی خلاف ورزیاں شامل ہیں اسی بنا پر وہ ملائیشین حکام کی تحویل میں ہیں، وزیر اعظم پاکستان عمران خان کی خصوصی کاوشوں سے پاکستانی شہریوں کی رہائی ممکن ہورہی ہے۔