ٹنڈو آدم گٹکے کے کارخانوں پر چھاپے6 ملزم گرفتار

ایس ایس پی سانگھڑ فرخ علی کی خصوصی ٹیم نے ٹنڈو آدم شہر کے بلوچ محلہ بھٹ شاہ بس اسٹاپ اور دیگر علاقوں میں گٹکے کے کارخانوں پر چھاپے مارے۔

پولیس نے چھالیہ،چونا، کتھا، کپڑے دھونے کا صابن، 6 موٹر سائیکلیں برآمد کرکے 6 افراد کو گرفتار کرلیا۔ دوسری جانب کارروائی کیخلاف کارخانے کے مالکان نے پولیس کیخلاف احتجاجی مظاہرہ کیا ٹنڈو آدم سٹی تھانے کے سامنے محمدی چوک پر ٹائر نذر آتش کیے اور پولیس کے خلاف نعرے لگائے۔ گٹکا فروشوں نے کہا کہ ہم پولیس کو ہر ہفتے فی کارخانہ 5 ہزار روپے بھتہ دیتے ہیں۔




اس کے باوجود پولیس نے ہمارے خلاف کارروائی کی ۔بعد ازاں پولیس اہلکاروں نے گٹکا فروشوں پر لاٹھی چارج کرکے انھیںمنتشر کیا ۔دوسری جانب شہریوں کا کہنا ہے کہ پولیس نے چند کارخانوں کیخلاف کارروائی کی ہے، انھوں نے تمام کارخانوں کے خلاف کارروائی کا مطالبہ کیا۔