مشرف رہا نہ ہوسکے لال مسجد آپریشن کے ذمے دار نہیں تحریری فیصلہ

آپریشن کا فیصلہ انتظامیہ نے کیا، مشرف کیخلاف ٹھوس ثبوت نہیں ملے، ایڈیشنل سیشن جج

INP/این این آئی/Numaindgan Express November 06, 2013

پرویز مشرف کا نام ای سی ایل میں موجود ہے، اسے نکالنے کیلئے کوئی نوٹیفکیشن جاری نہیں کیا گیا۔ذرائع۔ فوٹو: فائل

LONDON: سابق فوجی آمر پرویز مشرف کی ضمانت منظور ہونے کے باجود رہائی کی روبکار جاری نہ ہوسکی۔

ذرائع کے مطابق ایڈیشنل سیشن جج واجد علی خان منگل کو اسلام آباد ہائی کورٹ میں منعقد ہ تقریب کی وجہ سے عدالت میں دستیاب نہیں تھے، اسلیے مچلکے داخل نہیں کیے جا سکے۔ دوسری جانب وزارت داخلہ کے ذمہ دار ذرائع نے بتایا کہ پرویز مشرف کا نام ای سی ایل میں موجود ہے، اسے نکالنے کیلئے کوئی نوٹیفکیشن جاری نہیں کیا گیا۔

آئی این پی کے مطابق ایڈیشنل سیشن جج واجد علی نے پرویز مشرف کی درخواست ضمانت کا تحریری فیصلہ جاری کردیا۔ 4صفحات پر مشتمل فیصلے میں عدالت نے قرار دیا کہ لال مسجد آپریشن کا فیصلہ اسلام آباد انتظامیہ کا تھا، ملزم کے خلاف ایسا کوئی ثبوت ریکارڈ پر نہیں ہے جس سے ثابت ہوسکے کہ اس نے لال مسجد آپریشن کا حکم دیا تھا ، واقعے کے 6 سال بعد مقدمہ درج کرایا گیا لیکن اس کی وضاحت نہیں کی گئی ۔ این این آئی کے مطابق عدالت نے قرار دیا کہ پرویزمشرف لال مسجد آپریشن کے ذمے دار نہیں۔ غازی عبدالرشید قتل کیس میں بھی مشرف کے خلاف کوئی عینی گواہ موجود نہیں۔