پی آئی اے پرواز میں 2 مسافروں کی ہنگامہ آرائی ہیتھرو ایئرپورٹ پر پولیس کے حوالے

دونوں مسافروں کو بلیک لسٹ کر دیا گیا ہے، ترجمان پی آئی اے

ویب ڈیسک December 31, 2019

دونوں مسافروں کو بلیک لسٹ کر دیا گیا ہے، ترجمان پی آئی اے۔ فوٹو : فائل

پی آئی اے کی پرواز میں 2 مسافروں کی ہنگامہ آرائی پر لندن پولیس نے ہیتھرو ایئرپورٹ پر دونوں مسافروں کو گرفتار کرلیا۔

ترجمان پی آئی اے کے مطابق لندن سے اسلام آباد آنے والی پرواز پی کے 786 میں 2 مسافروں کی ہنگامہ آرائی کے باعث دونوں مسافروں کو لندن پولیس نے گرفتار کرلیا۔ دونوں مسافر نشے میں تھے اور دیگرمسافروں کو پریشان کررہے تھے، نشے میں دھت دونوں مسافر آپس میں لڑ پڑے اور بات ہاتھا پائی تک پہنچ گئی جس پر مسافروں نے فضائی میزبان سے شکایت کی۔

مسافروں کی ہنگامہ آرائی کے باعث جہاز کے کپتان نے ہیتھرو ایئرپورٹ پر کنٹرول ٹاور سے رابطہ کرکے پولیس طلب کرلی جب کہ طیارہ کو ٹیکسی وے پر سے واپس لے جایا گیا جہاں لندن پولیس نے دونوں مسافروں کو تحویل میں لے لیا۔

ترجمان پی آئی اے کا کہنا ہے کہ ہنگامہ آرائی کے باعث پروازایک گھنٹے تاخیر سے روانہ ہوئی جب کہ دونوں مسافروں کو بلیک لسٹ کر دیا گیا ہے۔