کراچی میں سردی کی شدت میں مزید اضافے کی پیش گوئی

PESHAWAR:
شہر قائد میں بدھ کو معمول سے تیز ہوائیں چلنے کی توقع ہے جس سے سردی کی شدت میں مزید اضافہ ہوسکتا ہے۔

محکمہ موسمیات کے مطابق آج شہر میں کوئٹہ کی شمال مشرقی سمت کی معمول سے تیز ہوائیں چل سکتی ہیں جس کے سبب سردی کی شدت میں اضافہ ہوسکتا ہے، ہواؤں کی زیادہ سے زیادہ رفتار 40 کلومیٹر فی گھنٹے تک بڑھنے کی توقع ہے۔


محکمہ موسمیات کے مطابق منگل کو شہر کا کم سے کم پارہ دوسرے روز بھی 9 ڈگری ریکارڈ ہوا جب کہ واضح رہے کہ پیر کی صبح بھی کم سے کم پارہ 9 ڈگری ریکارڈ ہوا تھا۔

منگل کو شہرکا زیادہ سے زیادہ پارہ مزید ایک ڈگری کمی سے 23 ڈگری سینٹی گریڈ ریکارڈ ہوا جب کہ صبح کے وقت ہوا میں نمی کا تناسب 70 جبکہ شام کو 32 فیصد اور شمال مشرقی سمت سے چلنے والی ہواؤں کی رفتار 22 کلومیٹر فی گھنٹہ ریکارڈ کی گئیں۔

محکمہ موسمیات کے ہیٹ ویو سینٹر کے مطابق اگلے 2 روز کے دوران کم سے کم پارہ 9 سے 11 ڈگری کے درمیان رہنے کا امکان ہے، دن کے وقت موسم خشک اور قدرے خنک جبکہ رات میں سرد رہنے کی توقع ہے۔