سب سے بڑا چیلنج ملک سے کرپشن کا خاتمہ اور تعلیمی نظام کو بہتر کرنا ہے، عمران خان
وزیراعظم عمران خان سے امریکی ورجینیا یونیورسٹی کے طلباء کے وفد نے ملاقات کی جس میں حکومت کے اصلاحاتی ایجنڈے اور معیشت کو درپیش مسائل پربات چیت ہوئی۔
وزیراعظم عمران خان نے طلبہ سے گفتگو کرتے ہوئے کہا کہ 1960ء کی دہائی میں پاکستان جنوبی ایشیا میں سب سے تیزترقی کرنے والا ملک تھا،لیکن بدقسمتی سے معاشرے میں کرپشن کے ناسورسے ملکی ترقی کا عمل جمود کا شکار ہوا، ماضی کی حکومتوں نے انسانی وسائل کے فروغ کونظر انداز کیا۔
وزیرِ اعظم عمران خان سے ورجینیا یونیورسٹی کے طلبا ء کے وفد کی ملاقات۔ ورجینیا یونیورسٹی کے شعبہ بزنس ایڈمنسٹریشن سے تعلق رکھنے والے طلباء کے دورے کا مقصد پاکستان میں بزنس کے مواقع اور سیاحت کے حوالے سے موجود پوٹیشنل کے بارے میں آگاہی حاصل کرنا ہے۔ pic.twitter.com/TyGv8RC8ol
— Prime Minister's Office (@PakPMO) January 6, 2020
وزیراعظم نے کہا کہ عام آدمی کی حالت زار اورایوانوں میں کرپشن کے پیش نظرسیاست میں قدم رکھا، میرامقابلہ مافیا سے ہے جو ملک کی ترقی کی راہ میں حائل رہا ہے، بڑا چیلنج ملک سے کرپشن کا خاتمہ اور تعلیمی نظام کو بہتر کرنا ہے۔
عمران خان کا کہنا تھا کہ موجودہ حکومت یکساں تعلیمی نصاب کے لئے کوشاں ہے، حکومت کی کاوشوں کی بدولت معیشت میں استحکام آیا ہے ، پاکستان اقلیتوں کے حقوق کے مکمل تحفظ پر یقین رکھتا ہے۔
وزیراعظم نے مزید کہا کہ بھارتی حکومت کی فسطائی پالیسیوں سے خطے کے امن کو شدید خطرات لاحق ہیں اور بھارتی عوام کی شناخت خطرے میں پڑ گئی ہے، مودی سرکارنے پانچ سو ملین اقلیتوں کے تشخص اور وجود کو خطرے میں ڈال دیا ہے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔