فواد خان پاکستانی ڈراموں کے بعد بالی ووڈ نگری میں بھی اپنی دھاک بٹھانے کو تیار

فواد خان ڈراموں میں اپنی بہترین اداکاری سے پاکستانیوں سے داد وصول کرنے کے بعد پڑوسی ملک بھارت کے باسیوں کو بھی اپنا دیوانہ بنا چکے ہیں، فوٹو:فائل

---

ڈرامہ ہم سفر سے کامیابیوں کی بلندیوں کو چھونے والے فواد خان اب بالی ووڈ میں اپنی دھاک بٹھانے کو تیار ہیں، ڈرامے میں اپنی بہترین اداکاری سے فواد خان نے نا صرف پاکستانیوں سے داد حاصل کی بلکہ پڑوسی ملک کے باسیوں کو بھی اپنا دیوانہ بنا ڈالا۔

بالی ووڈ فلم کے لئے فواد خان کو اداکارہ سونم کپور کے ساتھ کاسٹ کر لیا گیا ہے، فلم 80 کی دہائی میں بنی ریشی کیش مکھرجی کی فلم ''خوبصورت'' کی کہانی کا ری میک ہے۔ فلم میں سونم کپور کا کردار ایک ایسی لڑکی کا ہے جو زندگی کو کھل کر جینا چاہتی ہے اور گھر کی پابندیوں اور اصولوں کی بندشوں سے باہر نکل کر اپنی زندگی کے راستوں کا تعین خود کرنا پسند کرتیں ہے، فلم میں فواد خان سونم کپور کی محبت میں گرفتار ہو جاتے ہیں۔

فلم کو سونم کپور کے والد انیل کپور پروڈیوس کر رہے ہیں اور اس کی ہدایت ششانکا گھوش دیں گی، فواد خان ہم سفر، داستان، اشک اور زندگی گلزار ہے جیسے مقبول ڈراموں اور پاکستانی فلم خدا کے لئے میں اداکاری کے جوہر دکھا چکے ہیں اور امید ہے کہ بالی ووڈ میں بھی وہ اپنی کامیابی کے جھنڈے گاڑنے میں ضرور کامیاب ہوں گے۔

واضح رہے کہ 1980 میں ریلیز ہوئی فلم خوبصورت میں بالی ووڈ کی مشہور ہیروئن ریکھا نے کام کیا تھا اور اس فلم کے کردار کے لئے انہیں فلم فیئر ایوارڈ سے بھی نوازا گیا تھا۔