کراچی فائرنگ اورتشددکے واقعات میں 5افراد ہلاک

عثمان آبادمیں گینگسٹر،قصبہ میں ایک شخص ہلاک،سہراب گوٹھ سے لاش ملی،4زخمی ۔ فوٹو: فائل

---

کراچی میں فائرنگ اور پرتشددواقعات کے دوران 5افرادہلاک اورخاتون سمیت 4زخمی ہو گئے۔

تفصیلات کے مطابق بھینس کالونی موڑیوسف گوٹھ میں واقع بھینسوں کے باڑے میں جھگڑے کے دوران فائرنگ سے40سالہ غلام اکبرہلاک ہوگیا،جس کی لاش جناح اسپتال لائی گئی،مقتول باڑے کا مالک بتایا جاتاہے اوراس کارشتے داروں سے تنازع بھی چل رہاتھا۔ پیرآباد کے علاقے فرنٹیئرکالونی نمبرایک اسلامیہ مسجدکے قریب نامعلوم ملزمان کی فائرنگ سے35سالہ ریاض ہلاک ہوگیا۔مقتول مسجدسے نماز پڑھ کرباہرنکلا تھاکہ اس دوران گھات لگائے ملزمان نے فائرنگ کردی،مقتول مشروبات بنانے والی کمپنی میں مزدوراور اس کا آبائی تعلق سوات سے تھا۔



عثمان آبادصدیق اکبرمسجدکے قریب نامعلوم ملزمان کی فائرنگ سے35سالہ محمدحسین میمن ہلاک ہوگیا، لاش سول اسپتال منتقل کردی گئی،مقتول کاتعلق لیاری گینگ وارسے تھا،واقعے کے وقت وہ پیدل تھااور وہ پیشی کے سلسلے میں عدالت جارہا تھا کے اسے گھات لگائے کھڑے ملزمان نے ٹارگٹ کیاہے، پولیس کے مطابق مقتول کا تعلق لیاری گینگ وارکے ہاشم گروپ سے تھااوروہ2ماہ قبل اغواکے مقدمے میں گرفتار ہوا تھا اور چند روز قبل جیل سے ضمانت پر رہا ہوا تھا ،مقتول کلاکوٹ کے علاقے عثمان آباد کا رہائشی اور 2 بچوں کا باپ تھا۔سہراب گوٹھ کے علاقے جمالی گوٹھ میں جھاڑیوں سے 22 سالہ عبدالرزاق کی لاش ملی جسے نامعلوم ملزمان نے اغوا کے بعد فائرنگ کر کے ہلاک کیا۔

مقتول جمالی گوٹھ کا رہائشی اور چنگ چی رکشا چلاتا تھاجبکہ مقتول کو نامعلوم افراد گھر سے بلا کر لے گئے تھے اورمذکورہ مقام پر لے جاکر اسے سینے پر گولی مار کر ہلاک کر دیااور لاش جھاڑیوں میں پھینک کر فرار ہوگئے،مقتول کا آبائی تعلق لاڑکانہ سے تھا۔کلاکوٹ کے علاقے گھاس منڈی کے قریب نامعلوم افرادکی فائرنگ سے32سالہ شہناززخمی ہوگئی۔سائٹ غنی چورنگی کے قریب نامعلوم افرادکی فائرنگ سے18سالہ اکرم زخمی ہوگیا۔لانڈھی میں نامعلوم افرادکی فائرنگ سے40 سالہ افضل خان زخمی ہو گیا۔رات گئے ملنے والی اطلاعات کے مطابق قصبہ موڑاسلامیہ کالونی میں گھر کے باہر بیٹھے ہوئے 30 سالہ راز محمد کو موٹر سائیکل سوارملزمان نے فائرنگ کر کے ہلاک کر دیا اور فرار ہوگئے ،مقتول 3 بچوں کا باپ اور اس کا آبائی تعلق بنوں سے تھا جبکہ واقعہ پرانی دشمنی کا شاخسانہ معلوم ہوتا ہے۔سہراب گوٹھ کے علاقے ایوب گوٹھ میں نامعلوم ملزمان کی فائرنگ سے 30 سالہ اصغر زخمی ہوگیا ۔