ن لیگ میں ہر بندہ وزارت عظمیٰ کا امیدوار ہے فواد چوہدری

ایم کیو ایم کا اپنا نقطہ نظر ہے، فواد چوہدری۔ فوٹو : فائل

---

وفاقی وزیر سائنس اینڈ ٹیکنالوجی فواد چوہدری کا کہنا ہے کہ (ن) لیگ میں ہر بندہ وزارت عظمیٰ کا امیدوار ہے۔

لاہور میں میڈیا سے گفتگو میں وفاقی وزیر سائنس اینڈ ٹیکنالوجی فواد چوہدری کا کہنا تھا کہ سیاسی جماعتوں میں اتحادیوں سے گلے شکوے اور اختلافات ہوتے ہیں، سیاسی جماعت کے رکن کے طور پر ان کی مجبوری سمجھ سکتا ہوں، خالد مقبول نے اپنی جماعت کے نام پر ووٹ لیے ہیں۔

فواد چوہدری نے کہا کہ ایم کیو ایم کا اپنا نقطہ نظر ہے، کل اسد عمر ایم کیو ایم کی قیادت سے مل رہے ہیں، حکومت کو کوئی خطرہ نہیں جب کہ بلاول کی ایم کیو ایم کو پیشکش بھی کوئی اہمیت نہیں رکھتی۔

وفاقی وزیر سائنس اینڈ ٹیکنالوجی کا کہنا تھا کہ ابھی تو اپوزیشن بھی بکھری ہوئی ہے، ہمیں تو سمجھ نہیں آرہی اپوزیشن میں بات کس سے کریں۔ انہوں نے کہا کہ شہباز شریف کا تلاش گمشدہ کا اشتہار دینے کی ضرورت ہے، نواز شریف کو باہر بھیجتے بھیجتے وہ خود باہر بھاگ گئے جب کہ (ن) لیگ میں ہر بندہ وزارت عظمیٰ کا امیدوار ہے۔