امریکا ملا فضل اللہ کو جب چاہے مار سکتا تھا جنرل قیوم

ملا فضل اللہ امریکا کا فیورٹ ہے،امریکی دوغلہ پن واضح ہو کر سامنے آ گیا،دفاعی تجزیہ نگار

INP November 10, 2013

حکومت طالبان سے مذاکرات میں سنجیدہ ہے، دفاعی تجزیہ نگار کی گفتگو۔فوٹو:فائل

KARACHI: معروف دفاعی تجزیہ نگار لیفٹیننٹ جنرل (ر) عبدالقیوم نے کہا ہے کہ یہ بات طے شدہ ہے کہ حکیم اللہ محسود کو امریکا نے مروایا ہے اور نئے طالبان کمانڈرمولانا فضل اللہ امریکا کا فیورٹ ہے اور وہ افغانستان میں پناہ لیے ہوئے ہے اوراگرا مریکا چاہے تواسے چند لمحوں میں ایک ڈرون کے ذریعے ہلاک کرسکتا ہے مگرامریکاکادوغلہ پن واضح ہوکرسامنے آگیاہے۔

وہ ہفتے کوضلع کونسل ہال میں یوم اقبال کے حوالے سے ہمدرد اسمبلی میں شرکت کے بعد میڈیا سے گفتگو کر رہے تھے۔ پروگرام کی صدارت چیف وارڈن سول ڈیفنس راجا مجاہد افسر نے کی۔

عبدالقیوم نے کہا کہ میاں نواز شریف کی حکومت طالبان کی ساتھ مذاکرات میں سنجیدہ ہے اور اس ضمن میں بڑی مثبت پیش رفت ہو رہی تھی کہ امریکا نے رنگ میں بھنگ ڈالا ہے، افغانستان سے امریکی انخلا ہونا ہے لہٰذا یہ وہ وقت ہے کہ پاکستان اور طالبان کے درمیان مذاکرات ہوں اور کوئی اچھی صورتحال سامنے آئے ۔ جنرل عبدالقیوم نے کہا کہ بلدیاتی انتخابات آزادانہ اور شفاف ہونے چاہئیں۔ قبل ازیں ہمدرد اسمبلی میں رنگارنگ پروگرام پیش کیے گئے۔