وزیراعظم کی زیرصدارت کشمیر سے متعلق اجلاس آرمی چیف کی بھی شرکت

سلامتی کونسل کا مقبوضہ کشمیر کی صورتحال پر غور سنگین حالات کی عکاسی ہے، وزیراعظم 

---

وزیراعظم عمران خان کا کہنا ہے کہ اقوام متحدہ کی سلامتی کونسل میں مسئلہ کشمیر پر بحث کا خیر مقدم کرتے ہیں۔

ایکسپریس نیوزکے مطابق وزیراعظم کی زیرصدارت کشمیر سے متعلق اعلیٰ سطحی اجلاس ہوا جس میں آرمی چیف جنرل قمر جاوید باجوہ، ڈی جی آئی ایس آئی لیفٹیننٹ جنرل فیض حمید، معاون خصوصی معید یوسف اور دیگرحکام بھی شریک ہوئے۔

اجلاس کے اعلامیے میں بتایا گیا ہے کہ اجلاس میں مقبوضہ کشمیر کی موجودہ صورت حال کا جائزہ لیا گیا اور مقبوضہ کشمیر سے متعلق بھارتی اقدامات کی مذمت کی گئی اور فیصلہ کیا گیا کہ رواں سال 5 فروری کو یوم یکجہتی کشمیر بھرپور طریقے سے منایا جائے گا۔

اعلامئے کے مطابق اجلاس کے شرکاء نے سلامتی کونسل میں مسئلہ کشمیر زیرِ بحث لانے کا خیر مقدم کرتے ہوئے کہا کہ سلامتی کونسل میں مسئلہ کشمیر کا زیرِ بحث آنا بین الاقوامی برادری کی ذمہ داری کا مظہر ہے۔ 9 لاکھ سے زائد بھارتی فوجیوں کے ذریعے انسانی حقوق کی خلاف ورزی کی گئی، آر ایس ایس سے متاثر بی جے پی حکومت مسلمان اور کشمیر مخالف مائنڈ سیٹ کے ساتھ امن و استحکام کیلئے مسائل پیدا کرنے کی ذمہ دار ہے۔ اجلاس میں بی جے پی حکومت کی سخت بیان بازی اور جارحانہ اقدامات کی مذمت کی گئی۔

قبل ازیں سماجی رابطے کی ویب سائٹ پر ٹوئٹ کرتے ہوئے وزیراعظم عمران خان نے کہا کہ مقبوضہ کشمیر عالمی طور پر تسلیم شدہ متنازع معاملہ ہے اور مقبوضہ کشمیر سلامتی کونسل کے ایجنڈے میں شامل ہے۔

وزیراعظم عمران خان کا کہنا تھا کہ پاکستان اقوام متحدہ کی سلامتی کونسل میں مسئلہ کشمیر پر بحث کا خیر مقدم کرتا ہے، سلامتی کونسل کا مقبوضہ کشمیر کی صورتحال پر غور سنگین حالات کی عکاسی ہے۔

 

J&K dispute must be resolved in accordance with relevant UN Security Council resolutions & the will of the Kashmiri people. We will continue to provide moral, political and diplomatic support to the Kashmiri people until they secure their inalienable right to self-determination.

— Imran Khan (@ImranKhanPTI) January 16, 2020

وزیراعظم عمران خان نے کہا کہ مقبوضہ کشمیر کا تنازعہ سلامتی کونسل کی قراردادوں اور کشمیری عوام کی خواہشات کے مطابق حل ہونا چاہیے اور کشمیریوں کو حق خودارادیت ملنے تک اخلاقی، سفارتی مدد جاری رکھیں گے۔