حکومت عوام کے لیے عذاب بن چکی ہے بلاول بھٹو زرداری

نالائق اور نااہل حکومت ہمارا آئینی حق بھی ماررہی ہے، بلاول بھٹو زرداری فوٹو: فائل

---

چیئرمین پیپلز پارٹی بلاول بھٹو زرداری کا کہنا ہے کہ حکومت ہر طر ف سے عوام کے لیے عذاب بن چکی ہے۔

کراچی میں تقریب سے خطاب کے دوران بلاول بھٹو زرداری نے کہا کہ پانی کا مسئلہ حل کرنا سندھ حکومت کی ترجیح ہے، سندھ حکومت نے ہزاروں کلومیٹر کی پانی کی پائپ لائنز بچھائی ہیں، سندھ میں پانی کا مسئلہ ایک دن میں حل نہیں ہوسکتا۔

چیئرمین پیپلز پارٹی کا کہنا تھا کہا کہ (ن) لیگ اور پی ٹی آئی کی معاشی پالیسیوں میں فرق نہیں، ناکام پالیسیوں کی وجہ سے ملک کو نقصان پہنچ رہا ہے، تحریک انصاف کی حکومت عوام دشمن ہے اور غریب دشمن معاشی پالیسی پرچل رہی ہے، حکومت ہر طر ف سے عوام کے لیے عذاب بن چکی ہے، حکومت ہر طرح سے غریب عوام کا خون چوس رہی ہے، گیس، بجلی اور پیٹرول سمیت ہر چیز مہنگی کردی گئی ہے۔ سلیکٹرز نے عمران خان کو لا کر عوام کو لائن میں لگ کر آٹا خریدنے پر مجبور کردیا ہے۔

بلاول بھٹو زرداری کا کہنا تھا کہ وفاق نےسندھ میں ایک پتھر تک نہیں لگایا، وفاق اٹھارویں ترمیم کے تحت سندھ کو اس کے حقوق دے، وفاق نے منصوبوں کے لیے سندھ کو ابھی تک فنڈز نہیں دیئے، نالائق اور نااہل حکومت ہمارا آئینی حق بھی ماررہی ہے، ہم اپنےحق سےزیادہ نہیں مانگ رہے، ہم دھمکی نہیں دے رہے کہ گیس بند کردیں گے۔

چیئرمین پیپلز پارٹی نے کہا کہ عمران خان کہتے ہیں کہ دو نہیں ایک پاکستان لیکن اگر ان کی پالیسی دیکھیں تو ایک نہیں دو پاکستان نظر آ رہے ہیں۔ ایک پاکستان میں قانون بھی ایک ہی ہونا چاہیے، پنجاب کاآئی جی فوری تبدیل ہوجاتا ہے لیکن سندھ کے لیے الگ قانون ہے، کیا آج تک سندھ ایک کالونی ہے؟ پنجاب کا آئی جی تبدیل ہوجاتا ہے اور وزیراعلیٰ کو پتہ ہی نہیں ہوتا، ایک سال سے سندھ میں جرائم بڑھ رہے ہیں، ہم مانتے ہیں کہ معاشی صورتحال کی وجہ سے جرائم میں اضافہ ہوا ہے لیکن امن اومان کی صورتحال پر لوگ ہم سے ناراض ہیں۔ وزیراعلیٰ کے پاس ان کی ٹیم ہوگی تو وہ احتساب کرسکیں گے۔