تمام این جی اوز اور پاور کمپنیوں سے اثاثوں کی تفصیلات طلب

خصوصی اکنامک وایکسپورٹ پراسیسنگ زونز سے بھی تفصیل 20 نومبر تک فراہم کرنیکی ہدایت

Irshad Ansari November 13, 2013

ایف بی آر نے ریجنل ٹیکس آفسز کو خطوط جاری کردیے، ٹیکسز چھوٹ کا پتہ چلایا جائیگا۔ فوٹو: فائل

ایف بی آرنے ملک میں کام کرنیوالی تمام این جی اوز،خصوصی اکنامک زونز، ایکسپورٹ پراسیسنگ زونز اورنجی بجلی پیدا کرنیوالی کمپنیوں کے اثاثہ جات،ان کی حاصل کردہ آمدنی اور ظاہر کردہ آمدنی، اخراجات وواجبات کی تفصیلات طلب کرلیں۔

سینئر افسرایف بی آرنے گزشتہ روز ''ایکسپریس'' کو بتایاکہ ملک بھرمیں قائم 18 ریجنل ٹیکس آفس اور3 لارج ٹیکس پیئر یونٹس کے چیف کمشنرز کو خطوط لکھے گئے ہیں جسکے ساتھ ایک پُرفارما کا نمونہ بھی بھجوایاگیاہے اور تمام چیف کمشنرز کو ہدایت کی گئی ہے کہ ایف بی آر ہیڈ کوارٹرز کی طرف سے بھجوائے جانیوالے پر فارمے کے نمونے کے مطابق تمام آرٹی اوزاورایل ٹی یوزکی حدودمیں قائم تمام این جی اوز، خصوصی اکنامک زونز،ایکسپورٹ پراسیسنگ زونز اور نجی بجلی پیداکرنیوالی کمپنیوں کے نام ،پتہ جات اور ٹیکس ائیر 2012 اثاثہ جات،انکی حاصل کردہ آمدنی اورظاہرکردہ آمدنی، اخراجات وواجبات سمیت دیگرتمام کوائف کی مکمل تفصیلات فراہم کی جائیں۔

ذرائع نے بتایاکہ تمام فیلڈ آفسز کو ہدایت کی گئی ہے کہ20 نومبرتک تمام ترتفصیلات تیارکرکے ایف بی آر کو بھجوائی جائیں۔ چھان بین کے دوران اس بات کاپتہ چلایا جائیگا کہ این جی اوز،خصوصی اکنامک زونز، ایکسپورٹ پراسیسنگ زونزاورنجی بجلی پیدا کرنیوالی کمپنیوں کو ٹیکسوںکی مد میں دی جانیوالی چھوٹ اور رعایت کاغلط استعمال تو نہیں کیا جارہا ہے۔