بچے نے مٹی کے کوالا بیچ کر آسٹریلوی جانور کے لیے لاکھوں ڈالر جمع کرلیے

اون کولی نے ننھے منے کوالا بنائے ہیں اور اسے صرف 10 روز میں پوری دنیا سے ڈھائی لاکھ ڈالر کے آرڈر ملے ہیں

ویب ڈیسک January 24, 2020

امریکی بچے اون کولی نے مٹی سے بنے کوالا فروخت کرکے آسٹریلوی جانوروں کے لیے کروڑوں روپے جمع کرلیے ہیں (فوٹو: گوفنڈ می)

RAWALPINDI: امریکا سے تعلق رکھنے والے چھ سالہ بچے نے آسٹریلیا کی ہولناک آگ سے متاثر قدرتی ماحول اور جانوروں کے لیے ایک مہم شروع کردی۔ اس مہم میں وہ گارے سے بنے کوالا بنا کر فروخت کررہا ہے ۔ اس کے جذبے کو دیکھ کر صرف 10 روز میں پوری دنیا سے اسے ڈھائی لاکھ ڈالر کے آرڈر ملے ہیں جو پاکستانی روپوں میں پونے چار کروڑ روپے کے برابر ہیں۔

اون کولی چار منٹ میں ایک کوالا بنالیتا ہے اور اسے سیاہ، سفید اور بھورا رنگ دیتا ہے۔ ہر فروخت ہونے والے کوالا سے ایک خاص رقم آسٹریلیا کی وائلڈ لائف ساؤتھ کوسٹ ریسکیو کو دی جائے گی۔

اون کولی کے والدین نے اپنے انسٹا گرام پر لڑکے کا پیغام شیئر کیا کہ وہ کوالا بیچ کر ایک ہزار ڈالرجمع کرکے یہ رقم جانوروں کی فلاح کے لیے دینا چاہتا ہے۔ بچے کی دادی نے مقامی اخبار میں بھی اس کی خبر دی تھی۔

اس کے بعد انٹرنیٹ پر چندے کے ایک پلیٹ فارم گو فنڈ پر یہی مہم چلائی گئی اورعطیات کا تخمینہ 5 ہزار ڈالر لگایا گیا۔ اس کے بعد یہ مہم تیزی سے مشہور ہوئی اور لوگوں نے اس پر مثبت ردِ عمل دیا۔ اس طرح دھڑا دھڑ کوالا کے آرڈر ملنے لگے اور اب انہیں 3000 مٹی کے کھلونوں کے آرڈر پورے کرنے ہیں۔