کراچی نارتھ ناظم آباد میں یکے بعد دیگرے 2 دھماکے 10 افراد زخمی

دھماکوں کے زخمیوں کو عباسی شہید اسپتال منتقل کردیاگیا۔ فوٹو: ایکسپریس

---

نارتھ ناظم آباد کے علاقے میں یکے بعد دیگرے2 دھماکوں میں کم از کم 10 افراد زخمی ہو گئے۔

ایکسپریس نیوز کے مطابق دونوں دھماکے نارتھ ناظم آباد میں پہاڑ گنج کے گنجان آباد علاقے کے بازار میں ہوئے۔ پہلے دھماکے کے فوری بعد بم ڈسپوزل اسکواڈ اور پولیس ٹیمیں جائے وقوعے پر پہنچی، بم ڈسپوزل اسکواڈ نے جائے وقوعہ کے معائنے کے بعد اسے کلیئر قرار دیا تاہم قریبی علاقے کا معائنہ نہیں کیا۔ بی ڈی ایس اور پولیس کے جانے کے کچھ ہی دیر بعد ایک اور دھماکا ہو گیا۔ دونوں دھماکوں میں زخمی ہونے والے 10 افراد کو عباسی شہید اسپتال منتقل کردیا گیا۔

اسپتال ذرائع کا کہنا ہے کہ دھماکے کے زخمیوں کو طبی امداد فراہمی کی جا رہی ہے تاہم تمام زخمیوں کی کی حالت خطرے سے باہر ہے۔ دوسری جانب ایس پی نارتھ ناظم آباد چوہدری اختر نے ایکسپریس نیوز سے بات کرتے ہوئے دونوں واقعات کو دہشت گردی کی کارروائی قرار دیا۔