دو دریا اور بوٹ بیسن کے ریسٹورنٹس کی ماحولیاتی صورتحال خراب نکلی

سیپانے ریسٹورنٹس کے غذائی کچرے،کوڑاکرکٹ ٹھکانے لگانے کے امور،نکاسی آب،عمومی صفائی اورہوٹلوں کے ماحول کا جائزہ لیا

Staff Reporter January 30, 2020

جائزہ رپورٹ کی روشنی میں ماحولیاتی خلاف ورزیوں کے مرتکب ریسٹورنٹس کیخلاف کارروائی کی جائیگی،ڈپٹی ڈائریکٹر عبیداللہ۔ فوٹو: فائل

وزیراعلیٰ سندھ کے مشیر قانون، ماحولیات، موسمیاتی تبدیلی اور ساحلی ترقی بیرسٹر مرتضیٰ وہاب کی ہدایات پر دو دریا اور بوٹ بیسن پر واقع ریسٹورنٹس کا ماحولیاتی معائنہ کیا گیا۔

ادارہ تحفظ ماحولیات سندھ کی ٹیم نے ڈپٹی ڈائریکٹر عبیداللہ کی سربراہی میں مذکورہ ریسٹورنٹس کی ماحولیاتی جانچ پڑتال کی اس ضمن میں ریسٹورنٹس کے غذائی کچرے اور کوڑا کرکٹ ٹھکانے لگانے کے امور کے شواہد اکٹھے کیے گئے، مذکورہ علاقوں کے ریسٹورنٹس کے نکاسی آب کے طریقوں کی بھی جانچ پڑتال کی گئی اس کے ساتھ ساتھ عمومی صفائی اور ریسٹورنٹس کے اندرونی ماحول کی بھی چیکنگ کی گئی۔

ابتدائی جائزے کے مطابق بیشتر ریسٹورنٹس کی ماحولیاتی صورتحال غیر اطمینان بخش تھی جبکہ تفصیلی جائزہ رپورٹ کی روشنی میں ماحولیاتی خلاف ورزیوں کے مرتکب ریسٹورنٹس کے خلاف ضابطے کی کارروائی کی جائے گی۔

واضح رہے کہ سندھ کے قانون برائے تحفظ ماحولیات 2014کے مطابق کسی بھی قسم کی تجارتی، صنعتی اور ترقیاتی سرگرمی کے دوران سندھ کے زمینی، فضائی اور آبی ماحول کو نقصان پہنچانا ممنوع ہے جبکہ خلاف ورزی کے مرتکب فرد یا ادارے کی صورت میں کے مجاز مالک پر بھاری جرمانہ عائدکیا جاسکتا ہے جبکہ ہٹ دھرمی دکھانے پر ایسے ادارے کو سربمہر بھی کیا جاسکتا ہے۔