ٹماٹر 8 لاکھ ٹن پیداوار کے باوجود قیمت 170 روپے کلو ہوگئی

بڑی وجہ رسد اور طلب میں 2 لاکھ65 ہزار کا فرق اور قلت کے باوجو د اسے بڑی مقدار میں بیرون ملک برآمد کرنا ہے

آن لائن November 18, 2013

قلت کے باوجود حکومت برآمد کنندگان کے دباو پر ٹماٹر اور پیاز کی برآمد پر پابندی کا فیصلہ کرنے میں کامیاب نہیں ہو سکی۔ فوٹو : فائل

ملک میں ٹماٹر کی 8 لاکھ ٹن کی کاشت کے باوجود ٹماٹر کی قیمت 170روپے کلو تک پہنچ گئی جبکہ پیاز کی قیمت میں بھی غیر معمولی اضافہ دیکھنے میں آیا ہے۔

تفصیلات کے مطابق زرعی ملک کی حیثیت سے پاکستان میں اس مرتبہ ٹماٹر کی پیداوار 8 لاکھ ٹن رہی لیکن اس وقت مارکیٹ میں اس کی قیمت 170روپے کلو تک پہنچ چکی ہے جسے کسانوں سے 18سے 20 روپے کلو میں خریدا گیا تھا۔ مارکیٹ ذرائع کا کہنا ہے کہ اس کی بڑی وجہ رسد اور طلب میں 2 لاکھ65 ہزار کا فرق اور قلت کے باوجو د اسے بڑی مقدار میں بیرون ملک برآمد کرنا ہے اور یہ صورت سب کے لیے پریشان کن ہے۔ دوسری طرف70 سے 80 روپے فی کلو میں فروخت ہونے والا پیاز بھی بنا کٹے ہی شہریوں کی آنکھوں سے آنسو نکال رہا ہے جس کی قیمت 200 روپے کلو تک پہنچ چکی ہے، اس حوالے سے حکومتی افسروں کا کہنا ہے کہ قلت کے باوجود حکومت برآمد کنندگان کے دباو پر ٹماٹر اور پیاز کی برآمد پر پابندی کا فیصلہ کرنے میں کامیاب نہیں ہو سکی۔