شہر کے مختلف علاقوں میں بارش سے موسم مزید سرد ہوگیا جب کہ بعض علاقوں میں بجلی کی آنکھ مچولی جاری ہے۔
ایکسپریس نیوز کے مطابق شہر قائد کے مختلف علاقوں میں بارش سے موسم مزید سرد ہوگیا اور اسی کے ساتھ مختلف علاقوں میں بجلی کی آنکھ مچولی بھی جاری ہے۔ نارتھ کراچی، بفرزون، گلشن اقبال، نارتھ ناظم آباد سائٹ ایریا، اورنگی ٹاؤن ، قصبہ، منگھوپیر، ڈیفنس، قیوم آباد، محمود آباد، منظور کالونی، قائد آباد، لانڈھی، کورنگی، ملیر، گلشن حدید اور اطراف کے علاقوں میں بھی بارش ہوئی جس سے موسم مزید سرد ہو گیا۔
دوسری جانب چھیپا ذرائع کا کہنا ہے کہ کراچی سپر ہائی پر غوثیہ شنواری ہوٹل کے قریب کرنٹ لگنے سے 50 سالہ شخص جاں بحق ہو گیا۔ بارش کے بعد کئی علاقوں میں بجلی کے ساتھ کے الیکٹرک کا عملہ بھی غائب ہوگیا اور ترجمان کے الیکٹرک نے روایتی بیان جاری کر کے ذمہ داری پوری کرلی۔
ترجمان کے الیکٹرک نے شہریوں کو احتیاط کی ہدایت کرتے ہوئے کہا کہ غیر قانونی ذرائع سے بجلی کا حصول ہرگز نا کریں، ٹوٹے ہوئے تاروں بجلی کے کھمبوں اور پی ایم ٹی سے دور رہیں، بارش میں بچوں کا خاص خیال رکھیں اور احتیاط برتیں، برقی آلات ننگے پاوں یا گیلے ہاتھ کے ساتھ نہ چھوئیں، بارش اور کھڑے پانی میں پانی کی موٹر جیسے برقی آلات کا غیر محفوظ استعمال حادثات کا سبب بن سکتا ہے۔