’’سب سیٹ ہے‘‘ کی دودہائی بعد دوبارہ واپسی

مزاح سے بھرپور اس ڈرامے کا سیکوئل ’’مڈ لائف‘‘ کے نام سے بہت جلد نشرکیا جائے گا

ویب ڈیسک February 06, 2020

ڈرامے میں کراچی کے متوسط طبقے سے تعلق رکھنے والے چار دوستوں کی کہانی دکھائی گئی تھی فوٹوفائل

اظفراورمانی کا مقبول ترین کامیڈی ڈراما ''سب سیٹ ہے'' تقریباً دودہائیوں بعد ایک بارپھر مداحوں کے چہروں پرمسکراہٹ بکھیرنے آرہا ہے۔

2000 کے اوائل میں نشرہونے والے سٹ کام ''سب سیٹ ہے'' نے بہت کم عرصے میں نہ صرف کامیابی کے جھنڈے گاڑ دئیے تھے بلکہ لوگوں کے دل جیت لیے تھے۔ ڈرامے میں کراچی کے متوسط طبقے سے تعلق رکھنے والے چاردوستوں بوبی، عمران، پنٹو اورنادیہ کی کہانی دکھائی گئی تھی، یہ کردار اظفرعلی، سلمان ثاقب شیخ عرف مانی، عدنان شاہ ٹیپو اور سلمیٰ نے ادا کیے تھے۔

دلچسپ بات یہ ہے کہ اس شو میں پہلی بارکراچی کے محلوں میں بولے جانے والے الفاظ جیسے ''ٹوپی''، ''ڈھکن'' اور ''برگر'' استعمال کیے گئے۔ ڈرامے کی کہانی اورمزاح لوگوں میں بے حد مقبول ہوا خاص کرکراچی کے نوجوان اس ڈرامے کو بے حد شوق سے دیکھتے تھے۔

''سب سیٹ ہے'' کو پسند کرنے والوں کے لیے خوشخبری ہے کہ مزاح سے بھرپور اس ڈرامے کا سیکوئل ''مڈ لائف'' کے نام سے بہت جلد نشرکیا جائے گا۔ ڈرامے میں عمران کا کردار ادا کرنے والے اداکار، ڈائریکٹر اور رائٹر اظفر علی نے تصدیق کرتے ہوئے کہا ہے کہ ہم لمبے عرصے بعد واپس آرہے ہیں۔

اظفرعلی نے ڈرامے سے متعلق مزید بتاتے ہوئے کہا کہ ''مڈ لائف'' میں ''سب سیٹ ہے'' کے چاروں مرکزی کرداروں کی مڈلائف یعنی ان کی زندگی کی آگے کی کہانی اور ادھیڑ عمری میں پیش آنے والے مسائل کو دکھایا جائے گا۔ اس کے علاوہ ''سب سیٹ ہے'' کی طرح ''مڈلائف'' مکمل سٹ کام نہیں ہوگا بلکہ سیریل ہوگا تاہم اس میں کامیڈی بھی دکھائی جائے گی جو ناظرین کو یقینی طور پر پرانے دور کی یاد دلائے گی۔

ڈرامے کی کاسٹ کے حوالے سے اظفرکا کہنا تھا کہ ڈرامے کے بنیادی کرداروں کے علاوہ اداکارہ مرینہ خان، عائشہ عمر، خالد انعم، بہروز سبزواری اور جنان حسین بھی ڈرامے کی کاسٹ میں شامل ہیں جب کہ حرامانی بھی مختصر کردار میں نظر آئیں گی۔