قومی کرکٹ ٹیم میں منتخب ہونا یا نہ ہونا قسمت کی بات ہے سرفراز

سابق ٹیسٹ کپتان سرفراز احمد نے کہا ہے کہ پاکستان ون ڈے کرکٹ ٹیم میں منتخب ہونا یا نہ ہونا قسمت کی بات ہے، اس وقت میری تمام تر توجہ پی ایس ایل فائیو پر مرکوز ہے۔

یہ بات انہوں نے کوئٹہ گلیڈی ایٹر کی اپنے اسپانسر کے ساتھ مفاہمت کی یادداشت پر دستخط کرنے کی تقریب کے موقع پر میڈیا سے گفتگو کرتے ہوئے کہی۔


پی ایس ایل فائیو میں اپنے اعزاز کا دفاع کرنے والی کوئٹہ گلیڈیٹر کے کپتان سرفراز احمد کا کہنا تھا کہ میں بھرپور محنت کر رہا ہوں، ٹائٹل کو برقرار رکھنے کی کوشش کریں گے، کامیابی کا دعویٰ نہیں کرتے لیکن امید یہ ہے کہ بہترین کارکردگی کا مظاہرہ کریں گے۔

فرنچائز کے مالک ندیم عمر نے کہا کہ پی ایس ایل فائیو میں اپنے اعزاز کا دفاع کرنے کے لیے پُرامید ہیں، پوری قوم کو پی ایس ایل کا انتظار ہے اور اس کی توجہ اور نگاہیں لیگ پر جمی ہیں، امید ہے کہ کراچی میں افتتاحی تقریب بہت شاندار رہے گی اور شائقین کرکٹ کی ایک بڑی تعداد اسٹیڈیم کا رخ کرے گی۔