چین وبائی مرض کی سب سے پہلے خبر دینے والا ڈاکٹر بھی کورونا وائرس سے ہلاک

ڈاکٹر لی نے سب سے پہلے وائرس سے خبردار کیا تھا جس پر انہیں ’سنسنی‘ پھیلانے کے جرم میں گرفتار بھی کرلیا گیا تھا

ویب ڈیسک February 07, 2020

34 سالہ ڈاکٹر لی نے گزشتہ برس ملک میں خطرناک وائرس کی وبا پھیلنے سے خبردار کیا تھا، فوٹو : ٹویٹر

چین میں کورونا وائرس کی وبا کے خطرے سے سب سے پہلے آگاہ کرنے والے ڈاکٹر لی وین لیانگ بھی کورونا وائرس کا شکار ہو کر جان کی بازی ہار گئے جس کے بعد ہلاک ہونے والوں کی تعداد 640 ہوگئی ہے۔

چینی نیشنل ہیلتھ کمیشن کے مطابق دو دن میں کورونا وائرس سے متاثرہ مزید 73 افراد ہلاک ہوگئے جس کے بعد مجموعی طور پر ہلاک ہونے والوں کی تعداد 640 ہوگئی ہے جب کہ 31 ہزار سے زائد مریض اب بھی زیر علاج ہیں۔

پراسرار وائرس کی ہلاکت خیزی کا مقابلہ کرنے والے میڈیکل اسٹاف اور چینی عوام کو اس وقت دھچکہ لگا جب اس ہلاکت خیز وائرس کی سب سے پہلے اطلاع دینے والے اور وائرس سے متاثرہ افراد کے علاج معالجے میں مصروف ڈاکٹر لی وین لیانگ خود بھی کورونا وائرس کا شکار ہو کر جہان فانی سے کوچ کر گئے۔

34 سالہ چینی ماہر امراض چشم نے گزشتہ برس دسمبر میں ووہان میں ایک پُراسرار وائرس کے پھیلنے کا انکشاف چینی ٹویٹر 'وائی ہو' کے ڈاکٹرز کے ایک گروپ میں کیا تھا، کورونا وائرس سے متعلق آگاہی پھیلانے پر چینی پولیس نے ابتدا میں انہیں ' افواہیں پھیلانے' کے جرم میں گرفتار بھی کرلیا تھا۔

ادھر چینی صدر شی جنگ پنگ نے اپنے امریکی ہم منصب ڈونلڈ ٹرمپ سے ٹیلی فونک گفتگو میں ہلاکت خیز کورونا وائرس پر قابو پانے کے عزم کا اظہار کرتے ہوئے کہا کہ بتدریج وائرس کنٹرول کرنے کے اثرات سامنے آنا شروع ہو گئے ہیں اور جلد ہی اس وبا کو پوری طرح ختم کر دیا جائے گا۔

دوسری جانب پراسرار وائرس چین کی حدود سے نکل کر 20 سے زائد ممالک تک جا پہنچا ہے، جہاں یہ وائرس اب تک 2 ہزار سے زائد افراد کو متاثر کرچکا ہے جب کہ ان ممالک میں کورونا وائرس سے ہلاک ہونے والوں کی تعداد 240 تک جا پہنچی ہے۔