سانحہ راولپنڈی پر آر پی او اور سی پی او کو عہدوں سے ہٹادیا گیا اختر حیات نئے آر پی او تعینات

نئے سی پی او راولپنڈی کے لئے ابھی کوئی فیصلہ نہیں کیا گیا ہے۔ فوٹو: فائل

---

پنجاب حکومت نے سانحہ راولپنڈی کی تفتیش کے سلسلے میں سی پی او اور آر پی او راولپنڈی کو عہدوں سے فارغ کردیا ہے جس کے بعد اختر حیات لالیکا کو نیا آر پی او اور رائے ضمیر کو ایس ایس پی سیکیورٹی تعینات کردیا گیا ہے جبکہ سانحے کے خلاف اہل سنت والجماعت کی کال پر سکھر میں ہڑتال کے باعث تمام کاروباری مراکز بند ہیں۔

ایکسپریس نیوز کے مطابق پنجاب حکومت نے سی پی او راولپنڈی بلال صدیق کمیانہ، آر پی او زعیم اقبال شیخ اور ایس ایس پی سیکیورٹی ڈار علی خٹک کو عہدے سے ہٹا کر اختر حیات لالیکا کو نیا آر پی او راولپنڈی اور رائے ضمیر کو ایس ایس پی سیکیورٹی تعینات کردیا ہے جبکہ سی پی او روالپنڈی کے لئے ابھی کوئی فیصلہ نہیں کیا گیا ہے۔ ذرائع کے مطابق بلال کمیانہ اور زعیم اقبال شیخ کو عہدوں سے ہٹانے کا فیصلہ اس لئے کیا گیا تاکہ وہ واقعے کی تفتیش پر اثر انداز نہ ہوں اور اس کے لئے متاثرہ فریقین کی جانب سے حکومت کو دباؤ کا سامنا تھا۔