دورہ جنوبی افریقا میں شامل عبدالرزاق اور شعیب ملک ان فٹ ہونے کے باعث ٹیم سے باہر

شعیب ملک پریکٹس کے دوران انگلی میں چوٹ لگنے اور عبد الرزاق ٹانگ میں تکلیف کے باعث ان فٹ ہیں۔ فوٹو: فائل

---

پاکستانی کرکٹ ٹیم کے مایہ ناز آل راؤنڈر عبد الرزاق اور شعیب ملک ان فٹ ہونے کے باعث جنوبی افریقہ کے خلاف سیریز سے آؤٹ ہوگئے ہیں۔

ایکسپریس نیوز کے مطابق دورہ جنوبی افریقہ کے لئے 17 رکنی ٹیم میں شعیب ملک اور عبد الرزاق کو بھی شامل کیا گیا تھا تاہم جوہانسبرگ میں پریکٹس کے دوران شعیب ملک انگلی میں چوٹ لگنے اور عبد الرزاق ٹانگ میں تکلیف کے باعث ان فٹ ہوگئے جس کے باعث اب وہ سیریز میں حصہ نہیں لے سکیں گے اور جلد وطن واپس لوٹ آئیں گے۔

واضح ہے کہ جنوبی افریقہ کے خلاف 3 ون ڈے اور 2 ٹی ٹوئنٹی میچز کی سیریز کے لئے پہلے ہی ان فارم فاسٹ بولر محمد عرفان کو ان فٹ ہونے کے باعث ٹیم سے ڈراپ کیا جاچکا ہے اور اب ان دونوں کھلاڑیوں کا بھی ان فٹ ہوجانا شائقین کرکٹ کے لئے کسی بری خبر سے کم نہیں ہے۔